22.07.2025 Скопје
Сингапур го задржа првото место на листата на најскапи градови во светот трета година по ред, според Извештајот за глобално богатство и начин на живот за 2025 година објавен од швајцарската банка Julius Baer.
Извештајот е базиран на индексот за начин на живот Julius Baer, кој ги споредува релативните трошоци за кошничка од 20 производи и услуги што богатите потрошувачи најчесто ги купуваат и користат во 25 големи глобални градови – како што се автомобили, накит, правни услуги и приватни училишта.
Шестото издание на годишниот извештај доаѓа во услови на глобална економска неизвесност, растечки геополитички тензии и бавно трошење.
Податоците се собрани пред администрацијата на Соединетите Американски Држави да ги објави плановите за воведување царини, па затоа последователните флуктуации на пазарот не беа земени предвид.
Значајно е што во извештајот е забележан пад од два проценти на трошоците за живот за лица со висока нето вредност, изразени во американски долари.
Ова е важно затоа што, според истиот извештај, „историски гледано, цените на луксузните производи и услуги се зголемиле двојно побрзо од просечните потрошувачки цени“.
Понатаму се наведува дека пад од повеќе од еден процентен поен укажува на предизвиците со кои се соочува луксузниот сектор. „Една од клучните причини е падот на цените на технологијата, кои станаа поевтини во сите региони“.
Спротивно на тоа, цените на билетите за бизнис класа и луксузните часовници значително се зголемија во претходната година – за 18,2 и 5,6 проценти, соодветно, се наведува во извештајот.
По Сингапур, следат Лондон и Хонг Конг, додека меѓу 10-те најскапи градови има дури пет од Европа – на четвртото и петтото место се Монако и Цирих, а Париз и Милано ја затвораат листата.
Дубаи се искачи на седмото место, од дванаесеттото место минатата година, што главно се припишува на зголемувањето на цените на недвижностите, автомобилите и шампањот.
Што се однесува до САД, единствениот град меѓу десетте најскапи е Њујорк, кој е на осмото место.
Подготвено од М.Д.
About Author
