05.06.2025 Скопје
Докажано е дека престојот во природа, особено во шумите, има позитивни ефекти врз менталното здравје и нивото на стрес. Нова студија спроведена во Австрија покажа дека 20 минути поминати во шумска средина значително го намалуваат нивото на стрес и го подобруваат расположението.
Во студијата учествувале 66 здрави возрасни лица. Тие биле случајно поделени во две групи. Едната група поминала 20 минути во шумата, додека другата поминала време во дел од градот без зеленило.
Пред и по нивниот престој на локациите, од учесниците биле земени примероци од плунка за да се измери хормонот на стрес кортизол. Покрај тоа, тие пополниле психолошки прашалници за мерење на расположението и емоционалната состојба.
Групата што поминала време во шумата имала значително пониски нивоа на кортизол, одржувала стабилно расположение, а негативните емоции се намалиле за 12 проценти. Од друга страна, во градската група не е забележана промена во нивото на стрес, додека позитивното расположение се намалило за 25 проценти.
„Нашата студија покажува дека дури и краткиот престој во шумата може да ја подобри менталната состојба и да го намали стресот“, рече д-р Даниел Халуз од Медицинскиот универзитет во Виена.
Овие откритија доаѓаат во важно време, кога сè повеќе луѓе, особено во градовите, ги чувствуваат ефектите од хроничниот стрес. Експертите предлагаат природата да биде повеќе вклучена во планирањето на урбаните средини, преку паркови, зелени површини и јавни шумски зони.
Дополнително, истражувачите ја нагласуваат важноста на достапноста на зелени површини за сите граѓани, бидејќи не секој е во можност често да патува или да оди на екскурзии. Кратка прошетка низ шумата или блискиот парк може да биде едноставна, но корисна мерка за менталното здравје.
Научниците планираат нови истражувања за да го испитаат влијанието на подолгите престои во природа, разликите меѓу видовите шуми и улогата на природните звуци и мириси во релаксацијата.
Истражувањето, спроведено во Винервалд, шумска област во близина на Виена, го водеше Медицинскиот универзитет во Виена во соработка со партнери.
Подготвено од М.Д.
About Author
