09.06.2025 Скопје
Според податоците на Федералниот завод за статистика, 1,1 милион лица над 67 години биле редовно вработени во Германија во 2024 година. Ова е за 51.000 повеќе од претходната година и највисока бројка досега забележана.
Во споредба со 2004 година, бројот на вработени лица на возраст за пензионирање е речиси четирикратно зголемен. Пред дваесет години, биле вработени само 288.000 лица над 67 години, иако вкупниот број на пензионери бил само малку помал, на 19,6 милиони, отколку денес, на 21,4 милиони.
Според Министерството за труд, во 2024 година просечната месечна нето пензија за оние кои придонесувале во пензискиот фонд најмалку 45 години била 1.543 евра. Дури и оваа сума е едвај доволна за преживување во поголемите градови каде што само киријата за двособен стан е во просек 1.000 евра. Најранливата група пензионери се оние кои, од различни причини, не биле вработени голем дел од својот живот или не уплаќале придонеси во пензискиот фонд, што често е случај со самохрани мајки или независни претприемачи.
Подготвено од М.Д.
About Author
