09.06.2025 Скопје
Сончаница се јавува кога лицето е изложено на директна сончева светлина, особено на главата и вратот. Првите симптоми се силна главоболка и покачена телесна температура, а може да се појават и замор, мачнина, поспаност, вртоглавица, зуење во ушите или краткотрајна загуба на слухот. Кај постарите лица може да дојде и до губење на свеста. За превенција, се препорачува да се избегнува долготрајно изложување на сонце, да се носи капа или светол чадор и повремено да се ладат главата и вратот со влажна крпа.
Ако некој добие сончаница, потребно е веднаш да се оддалечи од сонцето и да се смести во проветрена, разладена и затемнета просторија. Потоа, треба да се истушира и да пие течности во мали количини, а не се препорачува повторно изложување на сонце во следните денови. Доколку симптомите не се подобрат или се влошат, задолжително е да се побара лекарска помош.
Топлотниот удар не е секогаш последица само на директна сончева светлина, туку може да се појави и поради престој во топли и влажни простории, како што се пекари, кујни, автомобили или јавен превоз. Оваа состојба настанува кога телото брзо се прегрева и не може да ја регулира температурата. Симптомите вклучуваат телесна температура над 40°C, слабост, топла и сува кожа без потење, забрзан пулс и дишење, низок крвен притисок, вртоглавица, главоболка, гадење, повраќање и можност за губење на свеста.
Топлотниот удар е сериозна состојба и потребна е итна медицинска интервенција. Ако се сомневате на топлотен удар, веднаш повикајте брза помош. Додека чекате лекар, лицето треба да се однесе на ладно место, да се соблече од вишок облека, да се излади со вода (но не премногу ладна) или со вентилатор, и да се дадат течности ако е свесно. Препорачливо е да се избегнува физичка активност на високи температури додека лекар не дозволи.
Топлотната исцрпеност најчесто се јавува поради прекумерна физичка активност при високи температури и влажност. Карактеристични симптоми се обилно потење, мускулни грчеви, главоболка, повраќање, заматен вид, низок крвен притисок, слабост и можно губење на свеста. Во таков случај, лицето треба да се премести во сенка или проветрена просторија, да се напои со вода или благ чај и да се стават ладни облоги на главата.
Подготвено од М.Д.
About Author
