28.05.2025 Скопје
Владата усвои два стратешки и суштински закони за иднината на дигиталното општество: новиот Закон за електронски комуникации и првиот Закон за безбедност на мрежи и информациски системи (сајбер безбедност), соопштија од Министерството за дигитална трансформација.
Со ова, како што стои во соопштението, се отвора ново поглавје во дигиталната трансформација на земјата и се поставуваат темелите за модерна, сигурна и транспарентна држава.
Овие два закона се дел од Реформската агенда за дигитализација и транспарентност, и се целосно усогласени со NIS 2 директивата на Европската Унија, како и со мислењето на Уставниот суд на РСМ.
Закон за електронски комуникации, се подвлекува во соопштението, ги јакне правата на корисниците и гарантира повисоко ниво на заштита на личните податоци, воведува јасна правна рамка и транспарентност во работењето на операторите, обезбедува поголема конкурентност и регулаторна сигурност и ги дефинира надлежностите на Агенцијата за електронски комуникации, со фокус на отчетност и ефективен надзор.
Закон за сајбер безбедност воспоставува национален модел за управување со сајбер ризици, се создаваат нови институционални капацитети, Национален координативен совет за сајбер безбедност, Владин SOC – центар за одговор на сајбер инциденти, Сектор за сајбер безбедност во рамки на Владата, обезбедува поддршка за јавните институции и операторите од критичната инфраструктура и обврзува на ангажирање на сајбер професионалци во сите институции од критично значење.
Со донесувањето на овие два закона, РС Македонија прави крупен исчекор во европската интеграција и ја поставува дигиталната агенда како столб на идниот развој. Ова е конкретен резултат од визијата за дигитална РС Македонија, транспарентна, сигурна и иновативна, стои во соопштението од Министерството за дигитална трансформација и се додава дека визуелизацијата е направена со помош на вештачка интелигенција.
Подготвено од М.Д.
About Author
