29.05.2025 Скопје
Условите на рускиот претседател Владимир Путин за завршување на војната во Украина вклучуваат барање западните лидери писмено да се обврзат дека ќе го запрат проширувањето на НАТО кон исток и ќе ги укинат некои санкции кон Русија, според тројца руски извори запознаени со разговорите.
Американскиот претседател Доналд Трамп постојано нагласува дека сака да стави крај на најсмртоносниот конфликт во Европа од Втората светска војна, а во последните денови покажува зголемена фрустрација кон Путин, па вчера предупреди дека рускиот лидер „си игра со оган“ затоа што одбива да учествува во мировните преговори со Киев додека неговите сили остваруваат придобивки на фронтот.
Откако минатата недела разговараше со Трамп повеќе од два часа, Путин рече дека се согласил да работи со Украина на меморандум кој ќе ги постави принципите на мировниот договор, вклучувајќи и временска рамка за прекин на огнот.
Русија вели дека моментално ја подготвува својата верзија на меморандумот и не може да процени колку време ќе биде потребно.
Киев и европските влади ја обвинуваат Москва за застој додека нејзините трупи напредуваат во источна Украина.
Путин е подготвен да постигне мир, но не по секоја цена – изјави руски извор запознаен со размислувањата на највисоките претставници на Кремљ, кој сакаше да остане анонимен.
Пет услови според извори
Тројца руски извори рекоа дека Путин сака писмено ветување од големите западни сили дека НАТО, предводен од САД, нема да се прошири кон исток, што би значело исклучување на Украина, Грузија, Молдавија и другите поранешни советски републики од членството.
Русија сака Украина да биде неутрална земја, да укине некои западни санкции, да го реши прашањето за замрзнатите руски средства на Запад и да ги заштити руските говорители во Украина, велат три извори.
Поточно, условите на Путин се:
– Писмено ветување дека НАТО нема да се прошири на исток
– Украина како неутрална земја
– Укинување на некои западни санкции
– Решавање на прашањето за замрзнатите руски средства
– Заштита на рускиот јазик во Украина
Еден од изворите рече дека ако Путин сфати дека не може да постигне мировен договор по свои услови, ќе се обиде преку воените победи да им покаже на Украинците и Европејците дека „утрешниот мир ќе биде уште поболен“.
Кремљ не одговори на барањето за коментар.
НАТО претходно ги отфрли руските барања
Путин и руските претставници постојано нагласуваат дека секој мировен договор мора да се занимава со „основните причини“ на конфликтот, што за Русија пред се значи прашањето за проширување на НАТО.
Киев тврди дека Русија не смее да има право на вето врз аспирациите за членство на Украина во НАТО и дека ѝ се потребни силни безбедносни гаранции од Западот за да спречи каков било иден руски напад.
Администрацијата на украинскиот претседател Володимир Зеленски не одговори на барањето за коментар.
НАТО претходно соопшти дека нема да ја промени својата политика на „отворени врати“ само затоа што тоа го бара Москва. Портпаролот на 32-члената алијанса не одговори.
Русија моментално контролира нешто помалку од една петтина од територијата на Украина. Иако рускиот напредок се забрза во текот на изминатата година, војната се покажува како исклучително скапа и за Русија и за Украина, како во однос на човечките жртви, така и во однос на финансиските средства за одбрана.
Подготвено од М.Д.
About Author
