20.05.2025 Скопје
Производителите на автомобили се собираат за да отворат фабрики на нова локација на Блискиот Исток.
Земја што до неодамна не би ја поврзале со автомобилската индустрија, сега е на пат да стане нова автомобилска сила.
Саудиска Арабија полека станува фокус на производството на автомобили на Блискиот Исток. Како се случи тоа?
Работите добија полн ек во 2023 година кога Луцид отвори втор напреден производствен погон во богатото блискоисточно кралство. Американскиот производител го склопува моделот „Ер“ таму, користејќи комплети претходно произведени во главната фабрика на компанијата во Каса Гранде, Аризона. Сепак, целта на фабриката е да стане целосно развиен производствен погон до крајот на оваа деценија. Доколку сè оди според планот, фабриката ќе може да произведува до 150.000 возила годишно, кои ќе се продаваат и во Саудиска Арабија и на извозните пазари.
Иако отворањето на фабриката на Луцид не беше изненадување, со оглед на тоа што Јавниот инвестициски фонд на Саудиска Арабија во тоа време поседуваше повеќе од 60% од акциите на американскиот производител, новиот учесник на сцената секако беше. „Хјундаи“ започна со изградба на нова фабрика во автомобилскиот кластер „Крал Салман“, во рамките на економскиот град „Крал Абдула“ – нов град што Саудиска Арабија го основа пред две децении за да привлече инвестиции и да стане логистички и производствен центар на земјата. Ова ќе биде првата „производствена база“ на Хјундаи на Блискиот Исток и претставува „основа за Хјундаи да стане водечки бренд во Саудиска Арабија“.
Фабриката е предвидено да се отвори во четвртиот квартал од 2026 година, со годишен капацитет од 50.000 автомобили. Компанијата не откри кои модели ќе се произведуваат во објектот, но потврди дека ќе произведува електрични возила, како и оние со мотори со внатрешно согорување.
Објектот *Hyundai Motor Manufacturing Middle East (HMMME)* е заедничко вложување помеѓу производителот на автомобили и Јавниот инвестициски фонд на Саудиска Арабија. Државниот фонд ќе има 70% удел, додека Хјундаи ќе ги контролира преостанатите 30%.
Иако Саудиска Арабија не е типично место за производство на автомобили, нејзиниот ултрабогат суверен фонд за богатство ги привлекува производителите да отворат фабрики таму. Овие инвестиции се дел од националниот план за развој познат како Визија 2030, преку кој Саудиска Арабија се стреми да ја диверзифицира својата економија. Како дел од тој напор, земјата сака да стане помалку зависна од производството на нафта, а автомобилската индустрија е важен дел од тој план.
Подготвено од М.Д.
About Author
