29.05.2025 Скопје
Во објава на неговата платформа X, најбогатиот човек во светот му се заблагодари на Трамп за можноста да ја води новосоздадената Канцеларија за владина ефикасност, позната под акронимот DOGE (Оддел за владина ефикасност).
Белата куќа го започна формалниот процес на неговото заминување од позицијата „специјален владин службеник“ во среда вечерта, што му овозможи да извршува федерални работи до 130 дена во годината.
Позицијата на Маск беше привремена, а неговото заминување беше очекувано, но времето е значајно бидејќи доаѓа еден ден откако тој јавно критикуваше голем законодавен проект на администрацијата на Трамп.
„Како што истекува мојот мандат како специјален владин службеник, сакам да му се заблагодарам на претседателот Трамп за можноста да го намалам расипничкото трошење“, напиша Маск на X.
„Мисијата на DOGE само ќе се зајакнува со текот на времето, бидејќи станува начин на живот низ целата влада“, додаде тој.
Маск претходно изјави дека е разочаран од предлогот за буџет на Трамп, кој вклучува намалување на даноците од повеќе трилиони долари и зголемени воени трошоци.
Тој рече дека таканаречениот „голем, убав закон“, како што го нарекува Трамп, ќе го зголеми буџетскиот дефицит и ќе ја поткопа работата на DOGE.
„Законот може да биде одличен или убав, но не верувам дека може да биде и двете“, рече Маск.
На почетокот на својот мандат, Маск вети намалувања од најмалку 2 трилиони долари, но со текот на времето ја преполови таа бројка, а потоа дополнително ја намали на 150 милијарди долари.
Се проценува дека приближно 260.000 од вкупно 2,3 милиони вработени во цивилниот сектор на федералната влада ги загубиле своите работни места или прифатиле отпремнина што му се должи на DOGE. Во некои случаи, федералните судии ги запреле масовните отпуштања и наредиле враќање на вработените.
Имало и грешки, работниците во американската нуклеарна програма биле меѓу отпуштените.
Во април, Маск го објави своето пензионирање од владина улога и враќање на водењето на своите компании, велејќи дека DOGE сè повеќе станува жртвено јагне за сите проблеми.
„Сега сите го обвинуваат DOGE за сè“, изјави тој за Вашингтон пост пред лансирањето на SpaceX во Тексас. „Нешто лошо се случува насекаде, а ние сме обвинети иако немавме никаква врска со тоа.“
Во времето на политичкото вклучување на Маск, Тесла забележа пад од 13% во продажбата во првиот квартал, најголем во својата историја. Акциите паднаа за дури 45% и иако делумно се опоравија, тие сè уште се околу 10% под нивната почетна вредност.
Маск им кажа на акционерите дека во иднина ќе „посветува значително помалку време на DOGE“ и дека се враќа да го води Tesla. Тој исто така објави дека ќе ги намали политичките донации, откако минатата година потроши речиси 300 милиони долари за кампањата на Трамп и другите републикански кандидати.
Tesla беше цел на протести и вандализам, што ја натера американската државна обвинителка Пам Бонди да предупреди дека ваквите инциденти ќе се третираат како „домашен тероризам“.
Маск во вторникот на економски форум во Доха изјави дека ќе остане на чело на Tesla уште најмалку пет години.
Подготвено од М.Д.
About Author
