04.04.2025 Скопје
Цело Скопје е заробеник на неспособноста на ЈП „Комунална хигиена“ да ја одржува хигиената на градот, обвини градоначалникот на Општина Карпош Стевчо Јакимовски и побара со новиот закон за локална самоуправа ова јавно претпријатие да се подели меѓу општините во градот заедно со парите што ги плаќаат граѓаните за одржувањето на чистотата.
Имаше изговори дека за време на рамазанските празници помалку работат, дека треба да се стрпиме. По населбите каде што требаше да ги подигнуваат кантите, па и со недели дури не доаѓаа да ги земат. Ајде и тоа да го разбереме. Изгледа сега имаат добиено шеќерен шок од рамазанските пости и гледајте ова на што личи. Вака беше изминативе 30-40 години, очигледно вака ќе биде и во наредните 40 години благодарение на ЈП „Комунална хигиена“ и благодарение на неодговорниот однос на владата која што очигледно прави измени на законот за локална самоуправа во кој најбитно било да се смени градоначалникот ама не е најбитно и да се решат проблемите – додава Јакимовски.
Сопред него ова е еден од најгорливите проблеми на Карпош и на Градот Скопје.
Со новиот закон за локална самоуправа и територијална поделба на Град Скопје „Комунална хигиена“ мора да се подели по општините и мораме да го решиме проблемот со одлагањето на сметот.
Јакимовски исто така бара и законски измени со кои ќе се казнуваат сите што не го фрлаат ѓубрето во канти, затоа што владее целосна општествена неодговорност.
Градоначалникот апелира и до министерот за транспорт да не ги чува измените на законот за домување и да се донесе нов закон за комунална инспекција за конечно да се решат овие проблеми и Скопје да заличи на метропола.
Подготвено од М.Д.
About Author
