28.04.2025 Скопје
Синот на американскиот претседател Доналд Трамп, Доналд Трамп Џуниор, повторно дојде во Белград, по втор пат за еден месец, а синоќа беше угостен на вечера од српскиот претседател Александар Вучиќ.
Трамп Џуниор, извршен потпретседател на американскиот конгломерат „Trump Organisation“, пристигна во саботата со цел да се состане со српски бизнисмени. Претседателот на Стопанската комора на Србија, Марко Чадеж, истакна дека имале можност да ги презентираат своите проекти пред гостинот. Вучиќ исто така ја подвлече важноста на стратешката соработка помеѓу двете земји и потенцијалните заеднички проекти за иднината.
Ова е второ патување на Трамп Џуниор во Белград за помалку од еден месец. Претходно, тој беше во Србија во март, кога го интервјуираше Вучиќ за неговиот подкаст. А, во септември минатата година, тој ја посетил Србија во рамките на изборната кампања на својот татко.
Во саботата вечерта, Вучиќ на „Instagram“ се пофали дека ќе го угости Трамп Џуниор на вечера со печено свинско месо. „Би било глупаво да му понудиме ракчиња и орада“, напиша Вучиќ, споделувајќи фотографија од подготовката на јадењето за гостинот.
Подготвено од М.Д.
About Author
