11.04.2025 Скопје
Чистата и здравата животна средина останува врвен приоритет на Владата. За таа цел, за 2025 година се обезбедени 3,7 милиони евра преку Програмата за инвестирање во животната средина на Министерството за животна средина и просторно планирање.
Од Владата информираат дека средствата се наменети за различни сегменти од еколошката инфраструктура, како што се изградба на канализациони системи и постројки за пречистување на отпадни води (100 милиони денари), водоводни системи (100 милиони денари), како и образовни и истражувачки проекти (10 милиони денари). Дополнително, ќе бидат инвестирани 19 милиони денари во кампањи за подигнување на јавната свест, едукација и обуки поврзани со животната средина.
„Со оваа програма ја зајакнуваме заложбата за чист воздух, чиста вода и здрава почва. Веруваме дека инвестициите во животната средина се инвестиции во здравјето на граѓаните“, велат од владиниот кабинет.
Владата ги повика сите општини, граѓански организации и научни институции активно да се вклучат со свои проекти. Јавниот повик е веќе отворен, а рокот за аплицирање трае три недели. Деталите се достапни на официјалната веб-страница на Министерството за животна средина.
„Ги охрабруваме сите чинители – од локалната самоуправа до граѓаните – да аплицираат и да дадат придонес во создавање здрава животна средина за сите“, додадоа од Владата.
Подготвено од М.Д.
About Author
