03.04.2025 Скопје
На листата на претседателот на САД Доналд Трамп на земји за кои се воведуваат нови реципрочни тарифи, е и РС Македонија за која од денеска ќе се применува царина од 33%. Трамп го објави својот план за заштита на американската економија.
Стапките на новите царини на САД се движат од 10% до 49%, а РС Македонија се најде во групата земји со значителни давачки – 33%. На Балканот, најголема царинска стапка отсега ќе има Србија – 37 отсто, по што следува БиХ со 35 отсто, додека Албанија и Косово ќе имаат по 10 отсто.
Лани размената на РС Македонија со САД изнесувала 314 милиони долари, а во 2023 320,7 милиони долари, покажуваат податоците на Државниот завод за статистика.
Извозот од РС Македонија во САД лани достигнал 118,2 милиони долари, што е за 2,2 пати (220 насто) повеќе од претходната 2023 година кога бил 53,6 милиони долари. Лани од САД биле увезени производи за 195,9 милиони долари, за 26,6 отсто помалку од 2023 година кога увозот во РС Македонија од САД бил 267 милиони долари.
Податоците од американскиот Стејт департмент, пак, покажуваат дека „електричните машини и опремата на САД беа особено привлечни за увозниците во РС Македонија. Главниот извоз во САД е тутун, облека, железо и челик, стои на интернет страницата на Стејт департментот.
Подготвено од М.Д.
About Author
