08.04.2025 Скопје
Нов Зеланд нема да ги ревидира своите економски и фискални планови и покрај превирањата на глобалните финансиски пазари предизвикани од тарифните планови на американскиот претседател Доналд Трамп, изјави денеска министерката за финансии Никола Вилис.
Глобалната трговска војна предизвикана од сеопфатните царини на Трамп дополнително ескалираше вчера – откако тој се закани дека ќе ги зголеми царините за Кина, а Европската унија предложи свои контратарифи – бришејќи трилиони долари во вредност од берзите.
Трамп наметна еднострана царина од 10 отсто за Нов Зеланд, што е најниско ниво на неговите реципрочни царини за цел увоз во САД. Нов Зеланд соопшти дека нема да возврати.
Иако трговската политика на Трамп претставува ризик, Вилис рече дека нејзината влада презела мерки за ефикасно движење во период на несигурност на глобалните финансиски пазари. „Иако се непожелни, овие ефекти веројатно ќе бидат скромни во споредба со влијанието врз многу други земји“, им рече Вилис на новинарите.
„Имаме доволно отпорност да го издржиме тоа и сме во… среќна позиција во споредба со други за да можеме да се држиме до нашата економска и фискална стратегија“, додаде таа.
САД се вториот најголем пазар во Нов Зеланд по Кина. Минатата година таа пацифичка земја испратила околу 12 отсто од вкупниот извоз во САД, според официјалните податоци.
Главниот извоз на Нов Зеланд во САД, како што се млечни производи, месо и овошје, се меѓу најтргуваните стоки ширум светот, што дава поголема предност за диверзификација на извозните пазари, рече Вилис.
Подготвено од М.Д.
About Author
