05.04.2025 Скопје
До крајот на годинава започнуваме со изградба на гасоводот кон Грција, што ќе нè поврзе со Трансјадранскиот гасовод и ќе овозможи директен пристап до алтернативни извори на снабдување, изјави заменик-министерот за енергетика, рударство и минерални суровини Мирослав Лабудовиќ во своето обраќање на 11-та министерска средба на Советодавниот совет за Јужниот гасен коридор (SGC) и 3-та министерска средба на Советодавниот совет за Зелена енергија, што се одржа во Баку, Азербејџан.
Лабудовиќ нагласи дека ова не е само инфраструктурен проект, туку клучен чекор за зацврстување на позицијата на земјава како сигурен партнер во европските енергетски стратегии и порача дека сме подготвени да станеме стратешка транзитна точка за гас кон Европа.
Како што соопшти Министерството за енергетика, на маргините на конференцијата, Лабудовиќ и раководителот на секторот нафта и гас во Министерството за енергетика, Горан Николовски, остварија средби со претставници од Азербејџан, ЕУ и членови на присутните делегации од 24 земји, 7 меѓународни финансиски институции и 42 енергетски компании, на кои во фокусот на разговорите беа унапредување на соработката во областа на природниот гас, обновливите извори и борбата со метанските емисии.
Гасната соработка со Азербејџан е директен придонес за намалување на зависноста и обезбедување на алтернативни извори на снабдување со цел стабилност на европскиот пазар. Република Северна Македонија е подготвена да биде дел од решението – рече Лабудовиќ.
Јужниот гасен коридор беше инициран од Европската комисија во 2008 година како дел од напорите за намалување на зависноста на Европа од рускиот гас и зголемување на диверзификацијата на снабдувањето. Коридорот од Азербејџан до Европа ги вклучува SCPX, TANAP и TAP, со вкупна инвестиција од околу 35 милијарди американски долари. Главниот извор на снабдување е гасното поле Шах Дениз во Каспиското Море. Првата министерска средба се одржа на 12 февруари 2015 година, а потоа се одржаа уште 9 средби – Овие средби беа клучни за координација и развој на проектот Јужен Гасен Коридор, со учество на министрите за енергетика од земјите вклучени во проектот. На десеттата средба одржана на 2 февруари 2024 година, покрај редовните учесници, за прв пат присуствуваше и Полска, што укажува на интересот за проширување на коридорот кон Централна Европа. На оваа средба се дискутираше за можностите за зголемување на капацитетите на коридорот и интеграција со други енергетски проекти во регионот.
Подготвено од М.Д.
About Author
