04.04.2025 Скопје
Косовската претседателка Вјоса Османи побара од косовската влада да ги прекине увозните тарифи за сите американски производи бидејќи „Косово е подготвено за посилни односи (САД).
„Денеска официјално побарав од Владата на Косово да ги прекине царините за увоз на сите американски производи – важен чекор кон продлабочување на економските врски со нашиот најблизок сојузник“, рече Османи откако американскиот претседател Доналд Трамп воведе царини, вклучително и царина од 10 отсто за стоки од Косово.
„Косово е подготвено за посилни односи со Соединетите Американски Држави, со јасна визија што ќе ги направи двете наши земји посилни, побезбедни и попросперитетни“, напиша Османи на платформата „X“.
Уверена е дека овој потег ќе отвори нови можности за отворање работни места, размена на технологии и долгорочен економски раст.
„Повеќе од само економски потег, ова е цел на надворешната политика, што ја потврдува нашата трајна посветеност на односите Косово-САД, сојуз изграден врз заедничките вредности на слободата и децениската непоколеблива поддршка“, додаде таа.
Американскиот претседател Доналд Трамп во средата издаде нова извршна наредба со која се воведуваат реципрочни царини за земјите ширум светот, вклучувајќи го и Западен Балкан.
Според наредбата, како што објави Белата куќа во објава на платформата „Х“, најниски царини од десет проценти се воведени за стоката што се извезува од Косово, Албанија и Црна Гора во САД.
За стоките од РС Македонија воведени се царини од 33 отсто, а за оние од Босна и Херцеговина ќе изнесуваат 35 отсто.
Со извршна наредба на американскиот претседател беше воведена царина од 37 отсто за стоки од Србија.
Подготвено од М.Д.
About Author
