28.04.2025 Скопје
Стандардната работна недела, пет работни дена од девет до пет, наскоро може да биде минато. Барем така тврди основачот на „Microsoft“, Бил Гејтс, кој верува дека вештачката интелигенција (AI) ќе ги замени луѓето на повеќето работни места и ќе овозможи работа само два дена во неделата.
Во интервју, Гејтс рече дека AI ќе ја направи „интелигенцијата бесплатна“ за сите, што ќе има далекусежни последици за пазарот на трудот. Во иднина, AI ќе може да ги извршува повеќето задачи побрзо, попрецизно и поевтино од луѓето.
„Тоа е длабоко револуционерно бидејќи решава конкретни проблеми како што е недостигот на лекари или терапевти, но исто така носи огромни промени. Што ќе се случи со работните места? Дали ќе работиме само два или три дена? Вештачката интелигенција ќе донесе иновации, но останува прашањето дали ќе знаеме како да ја насочиме во вистинската насока“, рече Гејтс.
Гејтс алудира на доаѓањето на вештачката општа интелигенција (AGI) – моментот кога вештачката интелигенција ќе ги достигне, па дури и ќе ги надмине, способностите на луѓето во широк спектар на задачи. Според него, повеќето работни места ќе исчезнат, а ќе останат само оние за кои свесно ќе одлучиме дека сакаме да продолжат да ги извршуваат луѓе.
„На пример, нема да сакаме да гледаме роботи како играат бејзбол. Некои работи ќе ги задржиме за себе. Но, кога станува збор за производство, транспорт и земјоделство, тие на крајот ќе станат решени проблеми.“
Додека за некои визијата на Гејтс звучи како работничка утопија, други поставуваат сериозни прашања:
Што ќе се случи со луѓето чии работни места ќе бидат „решени“ од вештачката интелигенција? Како да се обезбеди приход за милиони ако работните места исчезнат?
Џефри Хинтон, познат како „кум на вештачката интелигенција“, предупреди дека напредокот во оваа област може да создаде екстремна нееднаквост, каде што мала група сопственици на технологија имаат сè, а остатокот од општеството – ништо. Во такво сценарио, иднината зависи од можноста да се издржуваат луѓето дури и без вработување.
Се појавуваат и етички прашања: кој ќе ја контролира оваа технологија и дали ќе се користи во корист на сите или за профит и моќ? Дури и Ватикан предупреди за потенцијални опасности ако вештачката интелигенција се најде „во погрешни раце“.
Радикално скратувањето на работната недела звучи како сон што се остварува, но патот до него е полн со непознати. Дали вештачката интелигенција ќе донесе олеснување од монотоната работа или ќе ги продлабочи општествените разлики?
Едно е сигурно, светот на работата каков што го знаеме се менува, и тоа побрзо од кога било.
Подготвено од М.Д.
About Author
