10.04.2025 Скопје
Германија наскоро ќе има нова влада, бидејќи коалицијата ЦДУ/ЦСУ постигна договор со социјалдемократите (СПД). Идниот канцелар Фридрих Мерц на прес-конференција ги открива деталите од коалицискиот договор, на денот кога беше објавено дека екстремно десничарската Алтернатива за Германија (АфД) првпат е пред конзервативците на анкетите.
Ќе земеме нов курс во миграциската политика, подобро ќе ја организираме и контролираме – изјави Фридрих Мерц.
Според него, на бегалците со ограничен статус две години нема да им биде дозволено да носат членови на семејствата во Германија. Тој најави и депортации во Сирија и Авганистан, кои наводно ќе започнат со лица кои имаат криминално досие.
Според коалицискиот договор меѓу Христијанско-демократската унија (ЦДУ) и Социјалдемократската партија (СПД), „новата сигурност за барателите на работа“ ќе овозможи построги санкции, вклучително и целосно укинување на бенефициите.
Коалициските партнери сакаат да воведат нов модел на воена служба заснован првично на доброволно учество. Оваа година треба да се создадат услови за воена регистрација и следење. Преговарачите, исто така, се согласија да формираат Совет за национална безбедност во Федералната канцеларија. Ова тело треба да ги координира клучните прашања од интегрираната безбедносна политика, да направи заедничка проценка на состојбите и со тоа да биде тело за заедничко формирање на политичка волја.
Исто така, ЦДУ/ЦСУ и СПД треба да го укинат Законот за греење. Новиот Закон за енергетика треба да биде „технолошки поотворен, флексибилен и едноставен“.
Пред нас е силен план кој ќе ни овозможи заеднички да ја движиме нашата земја. Коалицискиот договор е силен сигнал до граѓаните на државата. И ова е знак за европските сојузници: Германија ќе добие влада способна за дејствување – рече идниот канцелар Мерц на почетокот на конференцијата.
Осврнувајќи се на геополитичкиот контекст во кој се одвиваа преговорите, тој забележува дека руската агресија против Украина продолжува бидејќи Путин „не покажува подготвеност да стави крај на војната“, но ги признава и „новите турбуленции“ предизвикани од одлуките на американската администрација за царините.
Партијата Алтернатива за Германија (АфД) за првпат се најде на врвот на една голема анкета, што е знак на растечко незадоволство од големите партии.
Поддршката за конзервативниот блок на Мерц ЦДУ/ЦСУ, кој победи на изборите на 23 февруари, падна за пет процентни поени на 24 отсто, додека АфД напредуваше за три отсто и достигна 25 отсто, според анкетата на Ипсос.
Анкетата на Ипсос покажа дека поддршката за социјалдемократите (СПД) на канцеларот во заминување Олаф Шолц остана непроменета на 15 отсто.
Германските конзервативци предводени од лидерот на Христијанско-демократската унија (ЦДУ) и следниот канцелар Фридрих Мерц постигнаа договор со централно-левичарските Социјалдемократи (СПД) за формирање нова влада.
Подготвено од М.Д.
About Author
