14.04.2025 Скопје
Бројот на европски туристи кои ги посетуваат Соединетите Американски Држави бележи пад по враќањето на Доналд Трамп во Белата куќа.
Според податоците на Меѓународната трговска администрација (ИТА), бројот на патници од Западна Европа кои останале барем една ноќ во САД се намалил за 17 отсто во март оваа година во споредба со истиот период лани. Туризмот од земји како Ирска, Норвешка и Германија во САД се намалил за повеќе од една петина во истиот период.
Овој тренд претставува потенцијална закана за американската туристичка индустрија, која генерира речиси 2,9 трилиони долари економска активност годишно. Американскиот туристички сектор се соочува со повеќе предизвици, вклучувајќи ги и царините наметнати од претседателот кои ги подгреваат стравувањата од економско забавување. Царините, исто така, веројатно ќе ја намалат конкурентноста на американската економија во време кога доларот останува силен.
Силниот долар ги прави САД поскапа дестинација за Европејците, а инфлацијата која останува над целната стапка од 2 отсто низ целиот континент дополнително ги оптоварува буџетите на патниците.
Се очекува негативните промени во расположението кон САД кај патниците негативно да влијаат врз нејзиниот глобален пазарен удел, што ќе резултира со загуба од 1,5 процентни поени до 2026 година. Овој тренд следува по заострувањето на правилата за имиграција од страна на администрацијата на Трамп, што ја поттикна Велика Британија да ги ажурира своите совети за граѓаните кои патуваат во САД, предупредувајќи ги дека „треба да ги почитуваат сите услови за влез, виза и други услови“ или ќе се соочат со „апсење или притвор“.
Во меѓувреме, Џеф Фриман, претседател и извршен директор на Американската туристичка асоцијација, повика на итна акција за надградба на американскиот туристички систем.
„Патувањето е економска сила во САД, генерирајќи речиси 2,9 трилиони долари економска активност секоја година, но сега се соочуваме со растечки предизвици кои ја загрозуваат и иднината на индустријата и конкурентската предност на Америка“, изјави тој пред Поткомитетот за транспорт и поморска безбедност при Претставничкиот дом. „Реалноста е: сега е потребно смело лидерство за да се даде приоритет на патувањето. Нашите туристички системи се под притисок и без итна акција, ризикуваме да заостанеме.“
Вкупниот број странски посетители кои патувале во САД паднал за 12 отсто на годишно ниво во март, што е најстрмниот пад од март 2021 година, кога туристичкиот сектор се опоравуваше од ограничувањата поради пандемијата на ковид-19.
Подготвено од М.Д.
About Author
