03.04.2025 Скопје
Неоправданите, незаконски и непропорционални мерки можат само да доведат до понатамошна ескалација на царините и надолна економска спирала за САД и светот во целина, оцени претседателот на Комитетот за меѓународна трговија на Европскиот парламент, Бернд Ланге во реакција на одлуката на американскиот претседател Доналд Трамп за воведување на „реципрочни царини“ на увозот на стоки од ЕУ во САД.
Претседателот Трамп може да го нарече денешниот ден – „Ден на ослободувањето“, но од гледна точка на обичниот граѓанин ова е „Ден на инфлацијата“, наведе германскиот европратеник Ланге во писмената реакција.
Според него, ваквата одлука на Трамп ќе ги принуди американските потрошувачи „да го носат најтешкиот товар во трговската војна“.
Овие царини само ќе ги направат процесите и производството понеефикасни. Тие поттикнаа штетна несигурност во инвестициската клима. Берзите не можат да бидат појасни со своите реакции, наведе Ланге.
Тој најави дека ЕУ ќе одговори на ваквата одлука, преку законски, легитимни, пропорционални и решителни мерки.
Како ЕУ ќе разгледаме кои од алатките со кои располагаме се најпогодни за нашиот одговор. Ние не отстапуваме. Ние ќе го браниме нашиот суверенитет и нема да го менуваме законодавството што го обликувавме демократски и во интерес на граѓаните на ЕУ, дури и ако тоа не им се допаѓа на некои американски милијардери. Земјите кои се цел на овие мерки мора да одговорат со обединет фронт и да испратат јасна порака до САД да стават крај на ова царинско лудило, додаде европратеникот.
Тој натаму вели дека се надева оти Американската администрација е искрено заинтересирана за ангажман со ЕУ, иако, како што додава, не е сигурен во тоа.
Се надевам дека нашите аргументи и цврстината на нашиот одговор ќе обезбедат доволно стимулации за да ги доведат САД на преговарачка маса. Вратата на ЕУ секогаш ќе остане отворена за изнаоѓање решение, додава Ланге.
Трамп доцна синоќа објави воведување, како што ги нарече, „реципрочни тарифи“ во висина од 20 отсто за стоките произведени во ЕУ што се увезуваат во САД. Новите царини беа објавени веднаш по затворањето на Њујоршката берза, во текот на, како што го нарече Трамп, „Денот на ослободувањето“.
Подготвено од М.Д.
About Author
