04.04.2025 Скопје
Царините кои ги воведе американскиот претседател Доналд Трамп се главна тема во Европа.
Францускиот премиер Франсоа Бајру денеска објасни дека царинските мерки што ги воведе Трамп претставуваат економска катастрофа за светот и ќе создадат сериозни тешкотии за Европа.
„Ова не е само проблем за Европа – овие царини ќе бидат катастрофални и за самите САД и за американските граѓани, нагласи Бајру во изјава за медиумите“.
Францускиот премиер остро ја критикуваше американската политика, обвинувајќи ја администрацијата во Вашингтон дека им врти грб на своите сојузници.
„Се наоѓаме во сериозен период, во кој Европа и целиот Запад треба да размислат како да се справат со овие предизвици“, предупреди Бајру.
И францускиот претседател Емануел Макрон е незадоволен.
Макрон остро ги критикуваше најновите царини на Трамп за Европската унија. Трамп најави царина од 20 отсто за европските производи, кои Макрон ги опиша како „брутални и неосновани“.
Тој посочи дека американските потрошувачи ќе станат посиромашни и послаби поради овие мерки, додека азиските земји би можеле да го зголемат извозот во Европа. Макрон повика на заеднички одговор од европските земји за успешно укинување на американските царини, нагласувајќи дека европскиот одговор ќе биде „организиран“, „обединет“ и „посилен од порано“.
И претседателката на Европската комисија Урсула фон дер Лајен изрази длабоко жалење за американските царини, предупредувајќи на сериозни последици за глобалната економија. Таа најави дека ЕУ подготвува контрамерки кои би можеле да вклучат царини за американски производи во вредност до 26 милијарди евра.
Подготвено од М.Д.
About Author
