28.03.2025 Скопје
Европската унија (ЕУ) презема чекори за ограничување на количеството челик што може да се увезува во блокот без царина, како дел од пошироките напори за заштита на секторот од зголемениот увоз.
Европската комисија (ЕК), извршното тело на ЕУ, најави дека ќе го намали темпото на либерализација во секторот од 1% на 0,1%. Дополнително, Комисијата ќе престане да им дозволува на земјите да пренесуваат неискористени квоти во следните квартали за категории стоки кои вршат висок притисок врз увозот.
Одлуката е дел од поширокиот акциски план за челик што минатата недела го претстави ЕК. Еврокомесарот за индустриска стратегија Стефан Сежурне минатата недела рече дека блокот планира да го намали увозот на челик за дополнителни 15 отсто од април.
Челичната индустрија на ЕУ се залага за посилни заштитни мерки во светло на зголемениот притисок од глобалниот прекумерен капацитет и зголемениот извоз од Кина. Овие мерки првпат беа воведени во 2019-та година за да се заштити индустријата, откако американскиот претседател Доналд Трамп воведе царина од 25 отсто на увозот на челик, што ризикуваше да одземе многу залихи наменети за европскиот пазар.
По трговското примирје под претседателот Џо Бајден, администрацијата на Трамп повторно воведе царина од 25 отсто за целиот увоз на челик, заедно со алуминиумот.
Последната одлука на ЕК следи по истрагата што ја побараа 13 земји-членки, која покажа дека ситуацијата во индустријата се влошува поради зголемениот увозен притисок и падот на побарувачката.
„Новите мерки ќе обезбедат свеж воздух за производителите на челик во ЕУ да го зголемат производството, а со тоа да го вратат својот изгубен пазарен удел“, се вели во соопштението на ЕК. Се додава дека ЕУ, исто така, има за цел да ги зголеми вработеноста и инвестициите во производството на зелен челик. Мерката на претпазливост е продолжена до крајот на јуни 2026-та година.
Европската асоцијација за челик „Eurofer“ се залага за построги мерки за да се одрази новата динамика на пазарот и сака сеопфатен трговски режим по истекот на тековните заштитни мерки во 2026-та година за да се справи со деструктивните несакани ефекти од глобалниот прекумерен капацитет.
„Има малку простор да се запре тековната деиндустријализација, а за нерѓосувачкиот челик нема никакво олеснување. Увозот ќе продолжи да го уништува пазарот на челик во ЕУ“, предупредува Аксел Егерт, директор на лоби групата.
Подготвено од М.Д.
About Author
