03.03.2025 Скопје
Индиските државни рафинерии целосно ќе го пуштат во употреба најдолгиот гасовод за течен нафтен гас во светот до јуни, што значително ќе ги намали трошоците за транспорт на гориво и ќе помогне да се спречат смртоносни сообраќајни несреќи.
Ова ќе го промени начинот на снабдување со ТНГ и сè ќе оди како на лента за склопување – изјави извршниот директор на Индијан Оил, Н Сентил Кумар.
Проектот вреден 1,3 милијарди долари треба да замени стотици камиони кои патуваат низ земјата за да префрлаат гориво од рафинериите во фабриките, зголемувајќи го ризикот од несреќи.
Во декември 20 лица загинаа, 45 беа повредени и десетици возила беа оштетени откако камион удри во возило на индиската нафтена компанија во северозападниот град Џајпур.
Indian Oil, Bharat Petroleum и Hindustan Petroleum заеднички формираа IHB за да постават гасовод долг 2.800 километри од Кандла на западниот брег до градот Горахпур на север.
Првата фаза ќе започне во март, а целосно ќе биде оперативна од средината на оваа година, изјави Кумар, кој е и претседател на заедничкото вложување.
Мрежата ќе може да транспортира околу 8,3 милиони тони ТНГ годишно, или околу 25 отсто од вкупната побарувачка на Индија. Тоа веројатно значително ќе ги намали транспортните трошоци кај третиот по големина потрошувач во светот, бидејќи околу 70 отсто од бензинските пумпи сè уште го добиваат со камиони.
Локалната употреба на горивото, главно потребно за домашно готвење, порасна за четири петтини во текот на изминатата деценија на 29,6 милиони тони во фискалната година што завршува во март 2024 година, надминувајќи го зголемувањето на побарувачката за рафинирани нафтени продукти од 47 отсто.
Подготвено од М.Д.
About Author
