05.03.2025 Скопје
Европската Комисија попушти пред притисокот од европските производители на автомобили и им даде три години, наместо само една, да ги исполнат новите цели за намалување на емисијата на CO2 за автомобилите.
Европската унија оваа година значително ја намали границата на емисиите на јаглерод диоксид за автомобилите, барајќи од повеќето производители да се осигураат дека најмалку една петтина од нивната продажба се електрични возила (ЕВ) за да избегнат високи казни. Крајната цел е целосно елиминирање на емисиите до 2035 година.
Претседателката на Комисијата Урсула фон дер Лајен по состанокот со претставниците на автомобилската индустрија, синдикатите и здруженијата објави дека ЕК ќе предложи овој месец целите да се исполнат во период од три години, а не само во 2025 година.
„Постигнувањето на целите останува исто. Индустријата мора да ги постигне поставените цели, но ова и дава повеќе простор за прилагодување“, рече Фон дер Лејен. Таа додаде дека предлогот допрва треба да биде одобрен од земјите-членки и Европскиот парламент. Според планот, просечните емисии од производителите ќе се следат од 2025 до 2027 година.
Акциите на европските производители, вклучувајќи ги Фолксваген, Рено, БМВ и Мерцедес-Бенц, по објавата пораснаа меѓу 1,5 и 4 отсто.
Производителите на автомобили, кои се борат со падот на побарувачката, затворањето на фабриките и можните царини во САД, побараа од Комисијата да ги олесни правилата бидејќи проценуваа дека казните би можеле да достигнат 15 милијарди евра до 2025 година. Италија и Чешка, кои бараа намалување на казните, го поздравија предлогот.
Италијанскиот министер за индустрија Адолфо Урсо рече дека ова ја „спасила европската автомобилска индустрија“, додека чешкиот министер за транспорт Мартин Купка најави дека неговата земја ќе бара уште подолго, петгодишно продолжување.
Оливер Блуме, извршен директор на Фолксваген, рече дека го поддржува „прагматичниот пристап“ на Комисијата кој не го одложува намалувањето на емисиите, туку им дава на производителите флексибилност да ја забрзаат продажбата на поевтини електрични модели. Рено, исто така, го поздрави пофлексибилниот пристап, истакнувајќи дека овозможува намалување на емисиите додека ја одржува конкурентноста.
Сигрид де Врис, од европската асоцијација на производители ACEA, рече дека предлогот е позитивен, но дека целите сепак ќе биде тешко да се исполнат. Матијас Цинк, од здружението на добавувачи КЛЕПА, додаде дека тоа е „ограничено олеснување“.
ACEA, која повикува на уште подолги одложувања, предупреди дека индустријата се соочува со тешки избори, како што се драстично намалување на цените, намалување на производството или купување кредити за емисиите од Tesla и кинеските производители на електрични возила.
Волво, во мнозинска сопственост на кинеската Гили, рече дека компаниите кои се подготвиле на време за целите во 2025 година не треба да бидат казнети.
Од друга страна, организацијата Transport & Environment (T&E) го критикуваше предлогот, нарекувајќи го „подарок без преседан“ за автомобилската индустрија што дополнително ќе ја попречи Европа во трката да ја достигне Кина.
„Клучот за конкурентноста е да се произведуваат електрични автомобили по цени што повеќето луѓе можат да си ги дозволат. Кинезите веќе успеаја во тоа. Одложувањето во Европа нема да ја зголеми нашата конкурентност“, рече Вилијам Тодс од T&E.
Европската комисија планира да го објави својот акционен план за автомобилската индустрија во среда за да им помогне на европските производители да ја наелектризираат својата флота и да бидат во чекор со конкуренцијата.
Подготвено од М.Д.
About Author
