05.02.2025 Скопје
Уставниот суд на денешната седница ќе донесе одлука за Законот за данок на солидарност – ако го поништи законот, државата ќе мора да им ги врати 50-те милиони евра на 150 најпрофитабилни комании во РС Македонија, а ако го поништи, нема да се враќаат пари, туку тоа ќе значи дека во иднина не може да се примени ниту донесе идентичен закон. Трета опција е да се сопре постапката, но таа ретко се применува.
На седница лани во ноември Уставниот суд ги прифати како основани дел од наводите во иницијативите на пет подносители.
„Судот изрази сомнеж дека оспорениот закон ја повредува темелната вредност владеење на правото и фундаменталните принципи на кои почива, како што е правната сигурност на субјектите во нивната правна положба, правната предвидливост и правната извесност. Според дискусијата и аргументите, со донесувањето на законот е нарушена правната сигурност на компаниите кои оствариле профит над 615.000 000 денари во 2022 година, со тоа што во септември 2023 година е донесен закон кој им наложува задолжителен вонреден данок на солидарност на веќе одданочениот профит од претходната година. Уставните судии изразија сомнеж дека станува збор за закон кој произведува повратно дејство, што е во спротивност со Уставот. Судот го имаше во предвид фактот дека ретроактивноста и нејзиниот исклучок е дозволен само кога станува збор за тековни постапки, но во случајот засегнатите субјекти ги окончале односите со плаќањето на данок во 2022 година“, соопшти тогаш Уставниот суд.
Судот оцени и дека со донесувањето на таков вид на данок, компаниите се ставени во нееднаква положба и дека Законодавецот направил упад во уставно загарантирано право на сопственост, како и упад во слободата на пазарот и претприемништвото.
Судијката Добрила Кацарска, во издвоено мислење предлага дека единствената исправна одлука на Судот сега ќе биде да ја запре постапката, затоа што законот имал еднократна намена, завршил и не постои во правниот поредок.
Министерката за финансии Гордана Димитриеска Кочоска по одлуката да се поведе постапката за оценка на уставноста рече дека ако судот го поништи законот, тие ќе ги вратат парите на компаниите.
Подготвено од М.Д.
About Author
