19.02.2025 Скопје
Повеќе од 60 китови угинаа, а властите се обидуваат да спасат уште десетици по масовното насукување на оддалечена австралиска плажа. Одделот за природни ресурси и животна средина на Тасманија соопшти дека јато од 157 единки се насукале во близина на реката Артур, северозападно од островот.
Околу 90 животни – вклучително и младенчиња, според сведоците – сè уште се живи, а тим експерти за заштита и ветеринари на терен проценуваат дали некој од нив може да се врати во морето. Тасманија забележа серија масовни насукувања на китови во последниве години, вклучувајќи го и најлошото во историјата на земјата во 2020 година, но црните делфини масовно не се насукале таму повеќе од 50 години.
Црните делфини можат да пораснат до шест метри во должина и да тежат до 1,5 тони. Властите велат дека јатото насукано во областа, на околу 300 километри од градот Лонсестон, е веќе подолго време, помеѓу 24 и 48 часа, а спасувањето ќе биде исклучително тешко.
„Првичните проценки покажуваат дека враќањето на китовите во морето ќе биде тешко поради непристапноста на локацијата, немирниот океан и предизвиците за транспорт на специјализирана опрема до оддалеченото подрачје“, изјави за медиумите портпаролот на министерството Брендон Кларк.
Иако спасувачките тимови успешно ги спасуваа китовите за време на неодамнешните насукувања на западниот брег, оваа ситуација е посложена и тие нема да можат да ги применат истите методи. Теренските тимови се обидуваат да ги идентификуваат единките со најдобри шанси за преживување и да ги одржат во живот и во што е можно подобра состојба додека се разгледуваат понатамошни опции за спасување. Благосостојбата на животните е приоритет, но тие се загрижени за безбедноста на спасувачките тимови.
„Плимните бранови се силни, така што обидот за враќање на китовите директно во такви услови би бил многу предизвикувачки и би претставувал огромен безбедносен ризик за нашиот персонал. Бидејќи ова се големи животни кои може да имаат смртна болка, постои ризик да се грчат и неконтролирано да се движат, што може да доведе до повреда“, велат тие, а исто така постои загриженост за можни напади од ајкули.
Властите ја повикаа јавноста да ја избегнува областа бидејќи во близина горат шумски пожари, а пристапот до патиштата е ограничен. „Глетката е апсолутно застрашувачка, овие китови се борат за живот и како да ме гледаат во очи“, изјави локалната жителка Џоселин Флинт.
Повеќе од 80% од насукувањата на китови во Австралија се случува во Тасманија, често на западниот брег. Околу 470 китови се насукаа на југ, во пристаништето Мекквари, во 2020 година, и покрај обидите за спасување, околу 350 угинаа. Уште 200 се насукаа во истата област во 2022 година.
Подготвено од М.Д.
About Author
