11.02.2025 Скопје
Законот за двојно државјанство што го олеснува добивањето германско државјанство, кој е на сила од јуни 2024 година, наскоро би можел повторно да биде заборавен. Фридрих Мерц, лидерот на Демохристијаните (ЦДУ) и фаворит за идниот канцелар, води кампања во која ветува дека ќе го укине овој закон, кој би ги загрозил стотици илјади гастарбајтери, особено од Балканот.
Неговата кампања се базира на една од најактуелните теми во Германија, а тоа е миграцијата. Имено, тој се залага за полесни депортации, одземање на пасоши на „криминални“ имигранти и се што би можело да ги спречи странците да дојдат во нивната земја.
Минатата година тој и неговата партија беа остро против новиот закон што владејачката коалиција одлучи да го спроведе, со кој на многумина им беше полесно да добијат пасоши и двојно државјанство. Едно од неговите сегашни ветувања е укинување на овој закон.
Законот го скрати условот за престој за германско државјанство од осум на пет години, со можност за добивање пасош по само три години за лицата со високо ниво на интеграција. Генерацијата на стари гастарбајтери, доселени пред 1974 година, не мора ниту да го докажува своето познавање на германскиот јазик.
Дополнително, новите правила дозволуваат и двојно државјанство, кое претходно беше достапно само за граѓаните кои доаѓаа од земјите-членки на ЕУ, како и некои други посебни случаи, како Мароко, кој не дозволува „ослободување“ на државјанството.
„Давање државјанство за џабе“
Фридрих Мерц смета дека со овој закон „за џабе се дава државјанство“, а доколку победи ќе се заложи за укинување на овој закон, но и за построги мерки против мигрантите, кои би опфатиле полесни депортации и одземање на пасошите на оние кои вршат кривични дела.
Германското сојузно министерство за внатрешни работи смета дека предлогот на Мерц да му се одземе пасошот е правно сомнителен.
„Губењето на германското државјанство само поради кршење на кривичните одредби не би било во согласност со уставот“, објасни портпаролот на министерството.
Укинувањето на двојното државјанство може да има големи последици за гастарбајтерите и би ги загрозило многумина кои долги години живеат и работат во Германија. Од околу 200.000 Срби кои легално работат и живеат во Германија, никој не сака да се откаже од првобитното државјанство, а во 2022 година, помалку од 2.000 луѓе го сториле тоа, поради претходните ограничувања.
Иако новиот закон им ги „отвори вратите“ на гастарбајтерите од Србија, германската бирократија е преоптоварена, па барањата може да траат со години за да се обработат, а чекањето за првиот расположлив термин може да трае и три или четири години. Поради ова, многу луѓе можеби нема ни да чекаат да се обработи нивното барање доколку Meрц го спроведе својот план.
Иако дозволата за постојан престој обезбедува најголем дел од правата што ги имаат и граѓаните на оваа земја, германскиот пасош носи три клучни предности. Тоа се право на глас за секого, полесно патување низ светот, со оглед на тоа што германскиот пасош се смета за еден од најсилните во светот, но и, најважно, можноста за трајно враќање во Германија, дури и по долго отсуство, што денес не е случај. Досега, доколку некој ја одјавил својата адреса во Германија повеќе од шест месеци, лицето автоматски ја губи дозволата за престој.
Но, едно од главните прашања е што ќе биде со луѓето кои доколку демохристијаните навистина го укинат законот, веќе ја започнале постапката и собрале документи. Експертите сметаат дека во тој случај би можело да има голем број тужби против државата.
Христијанско-демократската партија речиси сигурно ќе победи на предвремените избори на 23 февруари, бидејќи во анкетите убедливо води со околу 30 отсто од гласовите, но тоа не значи дека се е готово. Вистинското прашање кое ќе ја одреди судбината на гастарбајтерите е со кого ќе изберат да коалицираат по изборите. Мали се шансите да се осмелат да соработуваат со десничарската Алтернатива за Германија, која е жесток противник на миграцијата, а ако ги изберат Зелените или социјалдемократите за партнери, законот може да опстане.
Подготвено од М.Д.
About Author
