21.02.2025 Скопје
Трите најголеми синдикални организации во земјата го организираат овој сенароден протест, кој се очекува да предизвика значителни нарушувања во јавните услуги и транспортот низ целата земја.
Штрајкот ќе влијае на повеќе сектори, вклучувајќи го јавниот превоз, такси услугите и поморскиот транспорт. Се очекува прекин во движењето на траектите и товарните бродови, додека бројни продавници најавија затворање за време на протестот. Властите предупредуваат на можно затворање на клучни улици и булевари.
Централен настан на протестите ќе биде собирот на плоштадот Синтагма во Атина. Организаторите очекуваат масовно присуство, особено поради растечкото незадоволство меѓу граѓаните. Според неодамнешна анкета, дури 72% од Грците веруваат дека имало обиди од страна на Владата за прикривање на вистинските причини за несреќата.
Железничката катастрофа кај Темпи, која се случи пред две години, однесе 57 животи, претежно на млади луѓе. Неодамнешните откритија покажаа дека околу 30 лица преживеале по првичниот судир, но починале неколку минути подоцна поради недостаток на воздух и експлозија во товарниот воз. Овие сознанија дополнително го разгореа гневот на јавноста.
Властите ги советуваат граѓаните и туристите да ги одложат своите патувања на 28 февруари, особено оние кои планираат да патуваат со брод. Се препорачува внимателно следење на промените во распоредот на патувањата.
Овој масовен штрајк ја одразува длабоката болка и гневот на грчкото општество поради трагедијата кај Темпи, како и силното барање за поголема одговорност и подобрување на безбедноста во јавниот транспорт.
Подготвено од М.Д.
About Author
