17.02.2025 Скопје
Европа, чии лидери утре ќе се состанат во Париз, треба да направи „повеќе и подобро“ за својата колективна безбедност со оглед на „забрзаната ситуација“ за решавање на конфликтот во Украина и позициите на американската администрација, соопшти вечерва Елисејската палата.
„Ние веруваме дека, како резултат на забрзувањето на украинското прашање, а исто така и како резултат на она што го кажуваат американските официјални лица, постои потреба Европејците да направат повеќе, подобро и на кохерентен начин за нашата колективна безбедност“, рече неименуван советник на францускиот претседател Емануел Макрон.
Неформалниот состанок што францускиот претседател го организира утре во Елисејската палата за Украина и безбедноста во Европа ќе има за цел да го олесни продолжувањето на разговорите во Брисел за ова прашање, додаде советникот на Макрон.
Покрај Макрон, ќе присуствуваат и шефовите на владите на Германија, Велика Британија, Италија, Полска, Шпанија, Холандија и Данска, како и претседателот на Европскиот совет, претседателката на Европската комисија и генералниот секретар на НАТО.
Состанокот е организиран во ограничен формат од „практични“ причини, но има намера да се прошири, изјави советник на францускиот претседател.
„За нас сите се загрижени, секој треба да учествува во разговорот. Целта е да се утврди што можат Европејците да направат за себе со оглед на забрзувањето што го доживуваме во Украина како резултат на иницијативите на претседателот Трамп, рече тој.
Подготвено од М.Д.
About Author
