25.02.2025 Скопје
Украина и САД работат продуктивно на економски договор, кој е во центарот на напорите да се стави крај на руската војна во земјата, рече украинскиот претседател Володимир Зеленски во Киев за време на видео-конференцијата со лидерите на земјите од Г7, вклучувајќи го и американскиот претседател Доналд Трамп.
Украинскиот претседател им повтори на лидерите на Г7 дека и Европа и Украина мора да учествуваат во мировниот процес за Украина.
Зеленски учествуваше на состанокот на Г7 заедно со канадскиот премиер Џастин Трудо, кој денеска е во посета на Киев и чија земја е ротирачки претседавач со Г7 оваа година. На видео-конференцијата присуствуваше и претседателката на Европската Комисија, Урсула фон дер Лајен, која исто така престојува во Киев.
Зеленски ја опиша средбата како многу важен сигнал за поддршка за Украина и за украинскиот народ. Тој рече дека средбата била продуктивна.
Зеленски, исто така, рече дека за време на видео-конференцијата се разговарало за потребата од безбедносни гаранции за Украина и за конкретни начини да се обезбеди „крај на руската агресија и да се спречи нова слична“.
Тој додаде дека многу се потпира на единството на светот за поддршка на Украина – единството на Европа, на Америка, на сите делови од светот и на сите земји кои сакаат да живеат во мир и врз основа на предвидливи правила и меѓународно право.
На средбата, која се одржа преку видео-конференција, од Овалната соба на Белата куќа покрај американскиот претседател Доналд Трамп присуствуваше и неговиот француски претседател Емануел Макрон, кој е во посета на САД. На средбата преку видео-конференција учествуваа и лидерите на Велика Британија, Германија и на Италија.
Подготвено од М.Д.
About Author
