11.12.2024 Скопје
Редовното спиење може да биде поважно за здравјето на срцето отколку што се мислеше. Научниците открија дека дури и ако ги спиете препорачаните осум часа секоја вечер, нередовниот режим на спиење може да го зголеми ризикот од срцев удар и мозочен удар за повеќе од една петтина.
Д-р Жан-Филип Шапо од Универзитетот во Отава, кој ја предводеше студијата на повеќе од 72.000 луѓе, рече: „Нашите резултати сугерираат дека редовноста на спиењето може да биде поважна од должината на спиењето во намалување на ризикот од сериозни кардиоваскуларни болести“.
Според него, треба да се посвети поголемо внимание на неправилностите на спиењето во здравствените упатства и клиничката пракса поради нивното потенцијално влијание врз здравјето на кардиоваскуларниот систем.
Неправилните обрасци на спиење се поврзани со зголемено ниво на протеинот CRP (C-реактивен протеин), кој е показател за воспалителни процеси во телото. Емили Мекграт, од Британската фондација за срце, објасни дека воспалението е клучен фактор поврзан со кардиоваскуларните болести.
Мекграт додаде дека нарушениот сон може индиректно да влијае на здравјето на срцето, бидејќи може да влијае на нашиот начин на живот, вклучувајќи ги навиките за јадење и нивото на физичка активност.
Научниците анализирале податоци од 72.269 луѓе на возраст меѓу 40 и 79 години кои учествувале во студијата на Британската Биобанка. Испитаниците без историја на сериозни срцеви проблеми носеа трагачи за активност седум дена за да ги забележат нивните шеми на спиење. Врз основа на ова, беше пресметан нивниот „Индекс на регуларност на спиење“, при што 0 означува многу неправилни и 100 совршено редовни шеми на спиење.
Во период од осум години, истражувачите ги следеле здравствените резултати на учесниците, вклучувајќи срцев удар, срцева слабост и мозочен удар. Резултатите покажаа дека луѓето со неправилни обрасци на спиење имале 26% поголем ризик од сериозни кардиоваскуларни проблеми, дури и по прилагодување на факторите како што се внесот на кофеин и нивото на физичка активност. Умерено неправилните обрасци на спиење го зголемуваат овој ризик за 8%.
Подготвено од М.Д.
About Author
