26.12.2024 Скопје
Складиштето на гас во Европската унија се празнат со најбрзо темпо од енергетската криза пред три години, поради зголемената побарувачка поради постуденото време и помалиот увоз по морски пат.
Количината на гас во магацините во земјите на ЕУ е намалена за околу 19 отсто од крајот на септември, кога завршува сезоната на полнење на пазарите со гас, до средината на декември, покажуваат податоците на европската асоцијација на оператори за складирање гас European Gas Infrastructure ( GIE).
Во истиот период од претходните две години е забележан едноцифрен пад, па складиштата за гас останаа релативно полни во текот на зимската грејна сезона бидејќи температурите беа повисоки од вообичаените, а индустриите ја ограничија побарувачката поради повисоките цени.
„Досега оваа зима, Европа мораше многу повеќе да се потпира на своите подземни резерви отколку во претходните две години за да го компензира помалиот увоз на течен природен гас (LNG) и да ја задоволи поголемата побарувачка“, рече Наташа Филдинг од агенцијата за цени Аргус Медиа.
Европа се соочила со поголема конкуренција за увоз на ЛНГ од азиските купувачи, поради пониските цени од претходните години. Тоа доведе до забавување на увозот и потреба од користење на поголем дел од складираните резерви.
Последен пат кога резервите на гас во Европа беа толку брзо исцрпени до средината на декември беше во 2021 година, кога Русија почна да ги намалува испораките на гас пред нејзината инвазија на Украина.
Капацитетот за складирање гас на ЕУ сега е со 75 отсто, малку над просекот во изминатите 10 години, пред западноевропските земји да почнат да работат на намалување на зависноста од рускиот увоз. Лани зафатеноста на магацините во средината на декември беше близу 90 проценти.
Цената на гасот во Европа е за околу 90 отсто пониска од рекордната цена за време на енергетската криза во летото 2022 година, кога надмина 300 евра. Сепак, исцрпувањето на складиштата во текот на зимата може да го направи надополнувањето потешко и поскапо следната зима.
Според прописите на ЕУ, земјите-членки треба да ги наполнат своите магацини до 90 отсто капацитет до почетокот на ноември.
ЕУ во голема мера се снабдува со течен природен гас, кој станува сè пополитизиран.
Новоизбраниот американски претседател Доналд Трамп ја предупреди ЕУ дека мора да купи големи количини американска нафта и гас или да се соочи со царини, додека Катар се закани дека ќе ја прекине испораката на ЛНГ доколку членките строго ја спроведат новата директива за корпоративна одржливост и должна анализа, која предвидува казни за компаниите кои не ги исполнуваат критериумите за емисија на јаглерод диоксид и почитување на човековите и работничките права.
САД се најголемиот снабдувач на течен природен гас во ЕУ, а Катар е на трето место.
Друга причина за брзото празнење на складиштето е студеното време и периодот кога ниту соларните ниту ветерните електрани не произведуваат енергија, поради што е зголемена побарувачката за производство од гас.
Во некои земји-членки, празнењето на магацините беше уште побрзо. Во Холандија снабдувањето со гас е намалено за 33 отсто од почетокот на зимата, а во Франција за 28 отсто.
Подготвено од М.Д.
About Author
