18.12.2024 Скопје
Едно од омилените слатки на секој од нас никогаш не било поскапо. Иако чоколадото не е луксузен производ, неговиот тренд на пораст на цените наскоро би можел да го направи тоа, особено ако се земе предвид светската криза во производството на какао.
Главната причина лежи во глобалниот пораст на цените на суровините за производство на чоколадо, особено на какаото. Климатските промени и вирусните болести кои ги погодуваат дрвјата на какаото значително влијаат на производството. Со оглед на тоа што побарувачката за какао постојано расте, а понудата е ограничена, цената на оваа суровина постојано расте.
Цените на какаото се зголемија поради слабата жетва во Западна Африка, која го произведува најголемиот дел од светската понуда. Сувото време во Гана и Брегот на Слоновата Коска, најголемите светски производители на какао, ги намалува приносите, додека вирусната болест која ги напаѓа растенијата на какаото предизвикува загуби од 15 до 50% од жетвата. Овој вирус се пренесува преку инсекти кои се хранат со какао растенија.
Цената на какаото минатата година достигна највисоко ниво во последните 46 години, поради недостигот на залихи и прогнозите за натамошни дефицити. Во август 2023 година, цената на еден тон какао на меѓународниот пазар беше 3.400 долари, додека во јули 2024 година достигна речиси 8.400 долари. Во април истата година цената изнесуваше рекордни 12.000 долари, а моментално се приближува до таа сума.
Цените на какаото ќе продолжат да растат, бидејќи производителите често работат со однапред договорени цени. Многумина ќе изберат да го намалат процентот на какао во нивните производи, заменувајќи го со растително масло, како што е палминото масло, или да го зголемат процентот на поевтини состојки како што се јаткастите плодови и шеќерот.
Подготвено од М.Д.
About Author
