07.11.2024 Скопје
Новите одлуки на ЦЕФТА претставуваат голем напредок за бизнисите во регионот. Со поедноставување на царинските процедури и подобрување на безбедноста, овие иницијативи ќе ја направат трговијата во регионот побрза, побезбедна и поефикасна – придобивки што и бизнисите и потрошувачите ќе ги чувствуваат во наредните години. Станува збор за две клучни одлуки – признавањето на овластените економски оператори (ОЕО), кои се сертифицирани од страните на ЦЕФТА, како и воведувањето на нов систем за управување со ризик.
За транспортните и логистичките компании особено во нашата земја овие промени значително ќе им користат бидејќи ќе имаат помалку проверки, побрза обработка и поедноставен процес на царинење во сите седум членки на ЦЕФТА.
Овој поедноставен процес носи придобивки не само за бизнисите, туку и за потрошувачите, бидејќи стоките побрзо и поефикасно се движат низ синџирот на снабдување. Способноста за брзо и сигурно транспортирање на производите низ регионот ќе им даде конкурентска предност на компаниите со ОЕО сертификација.
ЦЕФТА воведува и нов систем за управување со ризик, кој се фокусира на идентификација и управување со пратките со висок ризик. Овој систем им овозможува на царинските органи да се насочат кон пратките кои се сметаат за потенцијално ризични, додека оние со помал ризик се ослободени од непотребни одложувања.
Подготвено од М.Д.
About Author
