13.11.2024 Скопје
Оваа година ќе биде најтопла досега и прва во која просечната температура беше за повеќе од 1,5 степени потопла од прединдустрискиот просек, објавија европските научници.
Агенцијата на ЕУ „Коперник“ проценува дека просечната глобална температура во 2024 година би можела да биде 1,55 степени над прединдустрискиот просек, во споредба со 1,48 степени во 2023 година. Генералниот секретар на ОН Антонио Гутереш веќе зборуваше за „климатски колапс“.
„По десет месеци, 2024 година е речиси сигурно дека ќе биде најтоплата досега и прва со температури над 1,5 степени над прединдустриските нивоа“, рече директорката на агенцијата Саманта Бургес.
„Тоа е пресвртница за глобалната температура што треба да послужи како катализатор за подигање на амбициите на претстојната климатска конференција COP29“, додаде таа.
COP29 започнува во понеделник во Баку, Азербејџан.
На климатската конференција во Париз во 2015 година, земјите се согласија да го ограничат глобалното затоплување на под два степени, идеално до 1,5 Целзиусови степени.
Подготвено од М.Д.
About Author
