28.11.2024 Скопје
Илон Маск ја критикуваше Европската комисија, нарекувајќи го телото „недемократско“, што е последна во серијата негови јавни критики на институциите и креирањето политики на Европската унија.
„Парламентот на ЕУ треба директно да гласа за работите и да не ги предава овластувањата на Европската комисија“, напиша Маск на социјалните мрежи откако европратениците и дадоа зелено светло на новата Комисија.
Гласаа 688 пратеници, од кои 370 гласаа за потврдување на Комисијата, 282 беа против, а 36 беа воздржани. Новата Комисија ја сочинуваат претседателката Урсула фон дер Лајен и 26 комесари. Комесарите, по еден од секоја земја-членка, беа назначени од националните влади, а потоа им беа доделени ресори од фон дер Лајен.
Маск во повеќе наврати ги коментираше политичките процеси во други земји или организации. Во октомври, тој се скара со потпретседателката на Европската комисија во заминување, Вера Јурова, нарекувајќи ја „олицетворение на банално, бирократско зло“, откако таа го нарече „промотор на злото“.
Политичкиот ангажман на Маск доживеа експоненцијален скок ова лето кога тој ја поддржа кандидатурата на Трамп за претседател на САД и инвестираше милиони долари во финансирање на кампањата на Трамп. Тој стана близок советник на новоизбраниот претседател, дури се приклучи на разговорот на Трамп со украинскиот претседател Володимир Зеленски и, наводно, се сретнал со претставникот на Иран во Обединетите нации.
Подготвено од М.Д.
About Author
