31.10.2024 Скопје
Според најновите истражувања, некои од намирниците кои редовно ги јадеме имаат значително влијание врз здравјето на мозокот.
Една таква храна на која науката посвети посебно внимание е боровинката, мала бобинка богата со хранливи материи која се чини дека има големи придобивки за меморијата и целокупната функција на мозокот.
Боровинките се познати по нивната висока содржина на антиоксиданси, особено флавоноиди како што се антоцијаните, кои позитивно влијаат на мозокот. Флавоноидите се биоактивни соединенија кои ги штитат клетките од оксидативно оштетување и воспаление, два клучни фактори за стареење на мозокот и когнитивна дегенерација. Студиите во Brigham and Women’s Hospital во Бостон открија дека антиоксидансите присутни во боровинките можат да ја подобрат комуникацијата помеѓу невроните и да ја стимулираат неврогенезата или растот на нови неврони.
Редовното консумирање боровинки е поврзано со подобрување на краткорочните и долгорочните функции на меморијата. Овие мали плодови, исто така, помагаат да се подобри пластичноста на невроните, што е клучно за способноста на мозокот да се приспособува, складира и враќа информации.
Освен што ја подобрува меморијата, боровинките помагаат во одржување на доброто кардиоваскуларно здравје и го намалуваат крвниот притисок, што е добро за мозокот. Добриот проток на крв е од суштинско значење за оптимално функционирање на сите когнитивни функции, вклучувајќи ја концентрацијата, брзината на обработка и меморијата.
Боровинките позитивно влијаат и на расположението. Некои истражувања го поврзуваат нивното консумирање со намалени симптоми на анксиозност и депресија благодарение на нивните антиинфламаторни и антиоксидантни ефекти, кои исто така може да имаат заштитен ефект против долгорочни невролошки нарушувања.
Подготвено од М.Д.
About Author
