14.09.2024 Скопје
Во Бугарија е потврдена колера, што е прв ваков случај во последните 103 години. Пациентот е 23-годишен индиски државјанин кој неодамна допатувал од Њу Делхи, соопшти Министерството за здравство.
Според Софискиот регионален здравствен инспекторат (РЗИ), заразеното лице почнало да чувствува симптоми на акутна дијареа и по лабораториски тест дијагнозата била потврдена од Националната лабораторија за особено опасни бактериски инфекции при Националниот центар за инфективни и паразитски болести.
Заразениот пациент е во изолација на Одделот за паразитски и заразни болести. Епидемиолошката истрага потврди дека пациентот за време на престојот во Бугарија не посетувал јавни места или ресторани.
Колерата е многу заразна болест предизвикана од конзумирање на контаминирана храна или вода.
Може да предизвика сериозни гастроинтестинални проблеми, дехидрација и има висока стапка на смртност.
Историски гледано, колерата била широко распространета во Индија, при што реката Ганг била главен извор на инфекција. Болеста се прошири низ целиот свет на почетокот на 20 век, што доведе до неколку пандемии.
Во Бугарија, колерата беше значаен проблем до почетокот на 1920-тите, при што последната голема епидемија се случи помеѓу 1914 и 1918 година, по што следеше еден случај во 1921 година.
Подготвено од М.Д.
About Author
