01.08.2024 Скопје
Украина ги доби првите авиони Ф-16 што со месеци ги бараше од западните сојузници за да одговори на серијата руски ракетни напади, потврди американски претставник.
Украина тврди дека Ф-16 се клучни за одбрана од континуираните руски ракетни напади.
Западот првично не сакаше да ги испрати ловците, плашејќи се дека вооружувањето на Украина со напредно оружје ќе доведе до уште поголема ескалација на војната со Русија.
Во меѓувреме, САД обучуваа украински пилоти да управуваат со авионите, а првата група пилоти веќе ја завршија обуката.
За време на посетата на Вашингтон претходно овој месец за да присуствува на самитот на НАТО, украинскиот претседател Володимир Зеленски ги повика сојузниците на алијансата да ги укинат сите ограничувања за употребата на оружјето што Украина го добива од Западот, а особено да ѝ дозволат на Украина да пука од западно оружје кон руските цели во проширен размер.
Засега не се знае колку авиони се дел од првата испорака, ниту пак кои земји ги испратиле. Украинската влада сѐ уште официјално не го потврдила приемот на авионите.
Американскиот претседател Џо Бајден одобри испраќање воени авиони од американско производство во Украина во август 2023 година, по неколкумесечниот притисок од Киев и внатрешната дебата во американската администрација, каде што некои официјални лица стравуваа дека потегот ќе ги ескалира тензиите со Кремљ.
Белгија, Данска, Холандија и Норвешка, сите членки на НАТО, ветија дека ќе ѝ испорачаат повеќе од 60 авиони на Украина.
Тој број се чини мал во споредба со руската борбена флота, која се проценува дека е околу десет пати поголема, наведува АП.
На Украина ѝ се потребни најмалку 130 ловци Ф-16 за да ја неутрализира руската воздушна супериорност, велат украинските власти.
Авионите F-16 можат да летаат со двојно поголема брзина од звукот и да патуваат повеќе од 3.200 км пред да наполнат гориво.
Подготвено од М.Д.
About Author
