20.08.2024 Скопје
Претседателката Гордана Сиљановска Давкова, во „Вила Билјана“ во Охрид, вчера ги прими македонистите од 57. Летна школа на Меѓународниот семинар за македонски јазик, литература и култура при Универзитетот „Св. Кирил и Методиј“, соопштуваат од нејзиниот кабинет.
„На средбата, претседателката Сиљановска Давкова беше информирана за реализацијата на тековните и планираните активности и содржини на 57. Летна на Меѓународниот семинар за македонски јазик, литература и култура при Универзитетот „Св. Кирил и Методиј“ којашто се одржува во Охрид до 29 август годинава“, известуваат од кабинетот на Сиљановска Давкова.
Истакнувајќи го големото значење на Меѓународниот семинар за македонски јазик, литература и култура за изучувањето и афирмацијата на македонскиот јазик, претседателката оценила дека големиот интерес во светот за македонистиката преку дејноста на 11 македонистички лекторати, ја нагласува потребата од нивно зголемување и преку универзитетски центри за изучување на македонскиот јазик, литература и култура.
„Претседателката им посака успешно реализирање на предвидената програма на 57. Летна школа, додавајќи дека истата со своите разновидни содржини претставува можност за стекнување на едукација во пракса, остварување на различни видови на соработка и придонесува за развојот на лекторатите по македонистика во светот и културната дипломатија“, велат од кабинетот на претседателката.
Меѓународниот семинар за македонски јазик, литература и култура досега има организирано 56 летни школи и три зимски школи, како и 50 меѓународни научни конференции на кои учествувале повеќе од 4.000 учесници од над 60 земји, меѓу кои истакнати македонисти, професори по македонски јазик и литература на странските универзитети, слависти, балканисти, преведувачи, научни работници и студенти што го изучуваат македонскиот јазик во нашите лекторати и универзитетите во светот. На годинешната 57. Летна школа којашто се одржува под мотото „Македонистички гордорек“ учествуваат 65 македонисти од 17 земји.
Подготвено од М.Д.
About Author
