29.08.2024 Скопје
Бугарија нема да влезе во еврозоната и да стане полноправна членка на Шенген зоната до 2026 година, се наведува во извештајот на аналитичарите.
Според нивните августовски прогнози, главниот проблем на Бугарија во моментов е политичката нестабилност.
Бугарија технички би можела да го усвои еврото до 2025 година доколку земјата има стабилна влада и постигне стабилност на цените, но сегашните услови укажуваат на одложување.
Постојаната политичка нестабилност и нивоата на инфлација кои ги надминуваат оние на Европската централна банка се очекува да ја попречат оваа временска рамка.
Во прогнозата се нагласува дека програмата за капитални расходи на Бугарија ќе продолжи да биде во голема мера зависна од финансирањето на Европската унија. И покрај потенцијалот за зголемени инвестиции, значителниот сектор за јаглен во земјата и потребата од програми за социјална помош за рударите може да го попречат напредокот кон зелена транзиција.
Бизнис климата во Бугарија се очекува постепено да се подобрува, иако земјата најверојатно ќе остане помалку атрактивна во споредба со другите источноевропски земји поради политичката нестабилност и неразвиената инфраструктура.
Економските аналитичари сметаат дека годишната стапка на инфлација во Бугарија ќе падне од 9,5 отсто во 2023 година на 2,7 отсто до крајот на оваа година, пред сѐ поради забавениот раст на цените на енергијата и храната, кои сочинуваат значителен дел од индексот на потрошувачките цени.
Бугарската инфлација и натаму ќе биде над просекот во еврозоната поради континуираните притисоци од услужниот сектор, зголемувањето на платите и промените на ДДВ, се заклучува во извештајот.
Подготвено од М.Д.
About Author
