05.08.2024 Скопје
Министерот за земјоделство, Цветан Трипуновски, деновиве информираше дека е постигнат договор за откупни цени на црвената пиперка. Прва класа – 40 денари, прва/втора класа – 30 денари, втора класа – 20 денари и трета класа – 12 денари за килограм.
Откупувачите и преработувачите се согласија дека ќе се придржуваат кон договорените цени во текот на целиот откуп, а Државниот инспекторат за земјоделство ќе биде постојано на терен и ќе се грижи за да се запазат динамиката и откупните цени на црвената пиперка.
Земјоделците изразија загриженост дека оваа цена не ги покрива трошоците за производство, особено кога климатските промени ги преполовуваат количините и го намалуваат квалитетот на родот.
„Секоја година е сè потешко да се одржи традицијата на правење домашен ајвар. Цените се високи, а квалитетот на пиперките е намален, што значи дека и вкусот на ајварот не е како порано. Со овие цени, се плашам дека ќе ја изгубиме македонската традиција”, изјави еден скопјанец, чие семејство има долгогодишна традиција на производство на овој деликатес.
Додека минатата година откупната цена беше помеѓу 45 и 50 денари, оваа година земјоделците се соочуваат со пониска цена и значително помали количини.
Климатските промени дополнително го зголемија предизвикот, со екстремни временски услови кои предизвикаа штета на нивите.
Оваа ситуација не само што влијае на земјоделците, туку и на културната практика на правење ајвар, која се пренесува од генерација на генерација.
Подготвено од М.Д.
About Author
