28.06.2024 Скопје
Хуан Орландо Ернандез (55), поранешниот претседател на Хондурас, осуден е од американски суд на 45 години затвор за злосторства поврзани со дрога.
Ернандез беше прогласен за виновен во март за заговор за увоз на кокаин во САД и поседување оружје, вклучително и митралези. Обвинителите во Њујорк рекоа дека тој управувал со Хондурас како „нарко-држава“ и земал милиони долари мито од трговците со дрога за да ги заштити од законот.
„Тој го асфалтираше кокаинскиот автопат до САД, заштитен со митралези“, рекоа обвинителите во завршните зборови пред изрекувањето на пресудата.
Покрај затворската казна, поранешниот претседател на Хондурас ќе треба да плати и парична казна од 8 милиони долари.
„Јас сум невин“, рече Ернандез на сослушувањето за изрекување на пресудата, и додаде „Бев погрешно и неправедно обвинет“, рече тој.
Судијата за време на сослушувањето го нарече „дволичен политичар жеден за моќ“, објави новинската агенција. Ернандез е во затвор во Бруклин од неговата екстрадиција во САД.
Ернандез беше претседател на Хондурас од 2014 до 2022 година, служејќи два последователни мандати во земјата со над 10 милиони жители. Тој првично се кандидираше како кандидат за ред и закон кој вети дека ќе се справи со криминалот поврзан со дрога во земјата.
Наместо тоа, обвинителите го обвинија за партнерство со „некои од најплодните шверцери на наркотици во светот за да изгради корумпирана и брутално насилна империја заснована на илегална трговија со тони кокаин во САД“.
Три месеци по напуштањето на функцијата, тој беше екстрадиран во Њујорк и уапсен во април 2022 година за да се соочи со федерални обвиненија во САД.
Ернандез претходно се сметаше за силен сојузник на САД, кои на неговата земја ѝ испратија повеќе од 50 милиони долари помош за борба против наркотици, како и дополнителни милиони долари во безбедносна и воена помош.
Во 2019 година, тогашниот американски претседател Доналд Трамп му се заблагодари на Ернандез за „многу тесната соработка со Соединетите Држави“. Ернандез, пак, им се заблагодари на Трамп и американскиот народ „за поддршката што ни ја дадоа во цврстата борба против трговијата со дрога“.
Обвинителите подоцна открија дека Ернандез бил поврзан со шверцери на дрога уште во 2004 година, многу пред да стане претседател, и дека го олеснил шверцот на околу 500 тони кокаин во САД.
Тие рекоа дека шверцерите на дрога му платиле милиони долари мито за да го олеснат шверцот на кокаин од Колумбија и Венецуела преку Хондурас во САД.
Подготвено од М.Д.
About Author
