19.04.2024 Скопје
Од четврток, 20 јуни до вторник, 25 јуни до 15 часот ќе се спроведува првото електронско пријавување на учениците за запишување во средно образование за учебната 2024/2025 година. Второто пријавување во јунскиот уписен рок ќе биде на 1 и 2 јули до 15 часот.
Со цел да се оптимизира процесот за запишување во средните училишта, Министерството за образование и наука (МОН) и оваа година овозможи електронско аплицирање.
Од МОН појаснија дека регистрација на системот нема да биде потребна и најавата ќе се врши исклучиво со корисничките сметки на schools.mk.
„Упатството за најава во системот и пополнување на пријавата ќе биде поставено со линк на страната за најава“, посочи МОН.
На крајот на март МОН го објави конкурсот за запишување ученици во јавните средни училишта за учебната 2024/2025 година. Во него се наведени потребните документи, начинот на аплицирање и конкурсните рокови.
Конечната ранг-листа со резултатите од запишувањето и слободните места по првото пријавување, секое училиште треба да ја објави на 26 јуни најдоцна до 9 часот, на јавно место во училиштето и/или на училишната интернет-страница.
Во училиштата каде што ќе има квалификациско тестирање ќе се организира на 28 јуни, а конечните ранг-листи со резултатите ќе бидат објавени на јавно место во училиштето.
Подготвено од М.Д.
About Author
