27.05.2024 Скопје
Кина најави уште 344 милијарди јуани (47,5 милијарди долари) за својата полупроводничка индустрија, потврдувајќи ги плановите да се потпре на домашното производство на клучните делови за широк спектар технолошки производи.
Пекинг инвестира стотици милијарди јуани во секторот на полупроводници за да ја намали зависноста од увоз во услови на построги трговски аранжмани во САД. Вашингтон постепено ги заострува контролите на извозот на чипови во Кина, тврдејќи дека Пекинг може да ги искористи за да ги зајакне своите воени капацитети.
Во 2014 година, Пекинг ја активираше првата фаза од фондот за интегрирана индустрија за чипови, познат и како „Голем фонд“, со регистриран капитал од 138,7 милијарди јуани. Во 2019 година беше активирана втората фаза, со што се достапни 204 милијарди јуани за индустријата за чипови.
Третата фаза беше официјално започната на 24 мај и регистрирана во Регулаторната управа на пазарот во Пекинг, според National Enterprise Credit Information Publicity System, владината агенција за кредитни информации, и ќе биде најголемата во рамките на кинескиот Инвестициски фонд за индустријата на интегрираните склопови од чипови, исто така, познат како „Голем фонд“.
Кинеското Министерство за финансии е најголемиот акционер, со удел од 17 отсто и уплатен капитал од 60 милијарди јуани, според Tianyanchi, база на податоци на компанијата. На второ место е „China Development Bank Capital“ со учество од 10,5 отсто.
Министерството за финансии не одговорило веднаш на барањето на Reuters за коментар за новиот фонд.
Базата на податоци наведува уште 17 други инвеститори во фондот, вклучувајќи пет големи кинески банки, „Industrial and Commercial Bank of China“, „China Construction Bank“, „Agricultural Bank of China“, „Bank of China“ и „Bank of Communications“, со удели од по шест отсто.
„Големиот фонд“ обезбедува финансирање за двата најголеми кинески производители на чипови, „Semiconductor Manufacturing International Corporation“ и „Hua Hong Semiconductor“, како и производителот на флеш мемории „Yangtze Memory Technologies“ и голем број помали компании и фондови.
Во третата фаза, фондот треба да се фокусира, меѓу другото, на опрема за производство на чипови.
Подготвено од М.Д.
About Author
