09.05.2024 Скопје
Испраќањето војници на НАТО во Украина би било „исклучително опасно“, соопшти Кремљ, додавајќи дека Москва внимателно ја следи украинската петиција со која се повикува на таква интервенција.
Во петицијата, објавена на веб-страницата на украинскиот претседател, се наведува дека Украина треба да побара од САД, Велика Британија и други земји да испратат војници за да се борат против руската инвазија.
Засега не се знае дали петицијата ќе го собере потребниот број од 25.000 гласови, што ќе го обврзе претседателот Володимир Зеленски да одговори со одобрување или отфрлање. До претпладнево беа собрани околу 1.600 гласови.
НАТО и помага на Украина со испраќање на се повеќе оружје, вклучувајќи тенкови и ракети со долг дострел, но се воздржува од директна интервенција со трупи на терен. И американскиот претседател Џо Бајден и рускиот претседател Владимир Путин предупредија дека тоа може да доведе до трета светска војна.
Францускиот претседател Емануел Макрон смета дека прашањето за испраќање западни трупи во Украина ќе биде „легитимно“ поставено доколку Русија ги пробие украинските одбранбени линии и ако тоа го побара Киев.
Портпаролката на руското Министерство за надворешни работи, Марија Захарова, изјави дека доколку Макрон испрати француски војници во Украина, тие ќе бидат легитимна цел на руската војска.
„ Доколку Французите се појават во зоната на конфликтот, тие неизбежно ќе станат цели на руските вооружени сили“, рече Захарова.
Подготвено од М.Д.
About Author
