29.05.2024 Скопје
Шефот за надворешна политика на Европската Унија, Жосеп Борел, во вторникот ги повика земјите да ги балансираат стравувањата од ескалација со потребата на Украина да се брани, велејќи дека Киев има право да го користи западното оружје за напади внатре во Русија.
„Според воените закони, тоа е совршено можно и нема противречности. Можам да возвратам или да се борам против оној што се бори против мене од своја територија“, рече Борел на почетокот на средбата со министрите за одбрана на Европска Унија.
„Морате да го избалансирате ризикот од ескалација и потребата Украинците да се бранат“, рече шефот на европската дипломатија.
Украина ги притиска своите западни поддржувачи да ѝ дозволат да гаѓа цели во Русија користејќи го оружјето со поголем дострел што Киев го добива од Западот.
Клучните поддржувачи на Украина, вклучително и САД и Германија, не сакаа да дозволат Киев да врши напади преку границата поради стравот дека би можело да ги доближи до директен конфликт со Москва.
Тврдењето на Борел беше поддржано од неколку други министри за одбрана на состанокот во Брисел.
Холандската министерка Кајса Олонгрен рече дека Холандија нема ограничувања и се надева дека „другите земји што имаат различни ставови ќе го променат тоа“.
„Сосема е изводливо тие да треба да удрат и внатре во Русија“, рече Олонгрен, додавајќи дека според неа тоа не треба да биде прашање за дебата.
Естонскиот министер Хано Певкур рече дека „навистина се надева оти сите земји што ги имаат овие средства ќе ѝ дадат дозвола и на Украина“.
„Не може да биде нормално Русија да напаѓа многу длабоко во украинска територија, а Украинците да се борат со едната рака зад грб“, рече тој.
Генералниот секретар на НАТО Јенс Столтенберг во понеделникот изјави дека „дојде време“ сојузниците да ги преиспитаат своите ограничувања, особено кога Русија го напаѓа украинскиот град Харков од своја територија.
Подготвено од М.Д.
About Author
