25.04.2024 Скопје
Извозниците на месо, риба, сирење и млечни производи од ЕУ мора да покажат санитарни сертификати.
Од Брегзит во 2016 година, сувомесните производи на Panzer, северозападен Лондон, изгуби 37 добавувачи од Европската унија, а откако земјата воведе нови гранични проверки, тој број може да се зголеми уште повеќе, стравува сопственикот Дејвид Џозефс.
Од 31 јануари извозниците на разладено и замрзнато месо, риба, сирење, млечни производи и сечено цвеќе од Унијата мора да покажат санитарни потврди потпишани од ветеринар или инспектор.
Британските трговци на мало и големо велат дека таквото барање може да го одложи пристигнувањето на стоката со недели. Предупредуваат дека почетокот на физичките контроли, заедно со зголемувањето на давачките, од 30 април ќе ја ограничи разновидноста и свежината на премиум храната како месните производи, сирењата, тестенините и маслиновото масло со неизбежно поскапување.
„Наоѓаме мали независни продуценти кои прават неверојатни работи што не мора да ги видите надвор од нивниот регион и ги носат во Лондон, но станува сè потешко затоа што некои од нив не сакаат да се занимаваат со документите“, изјави Патриша Мичелсон, сопственичка на продавницата за малопродажба и големопродажба La Fromagerie.
Новите бариери, исто така, ризикуваат да ја нарушат различноста на снабдувањето со храна и пијалоци во Британија, според Џон Фаран, извршен директор на еснафот за добра храна, кој претставува 12.000 независни прехранбени компании.
„Само најголемите преработувачи и трговци на мало ќе можат да се справат со таа бирократија и обемот на тие проверки. Помалите производители и трговци едноставно ќе се откажат и ќе имаме помалку избор и помалку добра храна и пијалоци“, рече тој.
За Даунинг стрит новите проверки се алатки за спречување на болести и штетници да влезат во Британија, а во нив се наведува и дека ќе ги израмни терените за британските извозници. Во 2021 година, Унијата веднаш ги примени своите правила, што доведе до одложувања на пристаништата и поттикна некои британски извозници да престанат да продаваат на пазарите на ЕУ.
Сопственикот на Josephs deli, кој продава производи од повеќе од 80 земји и снабдува речиси 200 ресторани, вели дека Брегзит бил катастрофа за неговиот бизнис.
„Владата вели дека нема да има никакви нарушувања. Гарантирам дека ќе има. Веќе имаме некои добавувачи на месо кои велат дека е дискутабилно дали е економски исплатливо да се снабдува Обединетото Кралство“, изјави тој.
Ник Карлучи, директор за продажба во Tenuta Marmorelle во јужна Англија, рече дека промените во јануари ги зголемиле трошоците и го продолжиле времето на испорака за некои производи за една недела. Карлучи увезува маслиново масло од неговата семејна фарма во Пуља, сирења бурата и моцарела, месо на парчиња, тестенини, предјадења и панетоне.
Увозот на само една палета од пет или повеќе различни меса од 30 април го чини 432 фунти повеќе отколку пред Брегзит, при што 120 фунти одат за сертификатот за ветеринар и 195 фунти за такси и давачки воведени од владата за покривање на трошоците на неговиот нов систем. На увезените 15 до 20 палети неделно новите трошоци ќе му ја намалат профитната маржа за десет отсто.
Подготвено од А.Ѓ.
About Author
