11.04.2024 Скопје
Владите, деловниот свет и банките за развој имаат уште две години да направат нешто за да избегнат многу полоши климатски промени, изјави Сајмон Стил, шеф на климата на Обединетите нации.
Научниците тврдат дека е неопходно до 2030 година да се преполоват емисиите на стакленички гасови за да се спречи зголемувањето на температурата за повеќе од 1,5 степени во однос на прединдустрискиот период.
Неуспехот би предизвикал екстремни временски услови и топлина.
И покрај ова, емисиите на јаглерод диоксид се зголемија на рекордно ниво минатата година, а сегашните ветувања на земјите за борба против климатските промени само маргинално ќе ги намалат глобалните емисии до 2030 година, доколку се исполнат.
Сајмон Стил, извршен секретар на Рамковната конвенција на ОН за климатски промени (UNFCCC), предупреди дека следните две години се „клучни за спас на нашата планета“.
„Сè уште имаме можност да ги намалиме емисиите на стакленички гасови со новата генерација национални климатски планови. Но, сега ни требаат посилни планови!“, истакна тој.
Говорејќи на конференцијата за тинк-тенк Chatham House во Лондон, Стил рече дека земјите од Г20 се колективно одговорни за повеќе од 80 отсто од глобалните емисии и затоа треба итно да дејствуваат.
Главната цел на овогодинешните преговори за борба против климатските промени во ОН е да се постигне договор за финансирање на земјите во развој кои имаат потешкотии во транзицијата од фосилни горива.
Стил рече дека парите може да се обезбедат преку простување на долговите, поевтино задолжување за посиромашните земји, нови извори на меѓународно финансирање како што се даноците за транспортни емисии и реформи на Светската банка и Меѓународниот монетарен фонд.
„Секој ден министрите за финансии, извршните директори, инвеститорите, банкарите за климата и развојот насочуваат милијарди долари. Време е да ги пренасочат тие долари“, нагласи тој.
Во „суперизборната“ година во која гласаат гласачите од Индија, Јужна Африка, Европа до Соединетите Држави, Стил рече дека климатските мерки премногу често „излегуваат од агендата на владите“.
Подготвено од А.Ѓ.
About Author
