26.04.2024 Скопје
Речиси четвртина од американските граѓани на возраст над 50 години очекуваат никогаш да не се пензионираат, додека 70 отсто од нив веруваат дека цените растат побрзо од нивните приходи, покажува истражувањето на AARP – Американското здружение на пензионери.
Според истите податоци, секој четврти граѓанин нема заштеди за пензија, што укажува на загриженоста на дел од населението поради неможноста да врзат крај со крај и покрај тврдењата на експертите дека американската економија закрепнува по две последователни години рекордна инфлација.
Дневните трошоци, трошоците за домување, како кирија и хипотека, се водечките причини поради кои граѓаните не можат да штедат за пензионирање.
Ова е реалноста во која демократскиот претседател Џо Бајден и неговиот републикански ривал Доналд Трамп се обидуваат да ја добијат поддршката од своите сограѓани пред ноемвриските избори.
Студијата, која се заснова на анкета на повеќе од 8.000 луѓе во соработка со невладиниот Центар за истражување на јавното мислење (NORC), покажува дека една третина од постарите граѓани имаат долг од кредитни картички повеќе од 10.000 долари.
12 отсто од нив должат 20.000 долари или дури и повеќе од таа сума. Дополнително, 37 отсто се загрижени за плаќање на основните животни трошоци како храна и домување.
„Премногу граѓани немаат пристап до пензиските заштеди, а тоа, заедно со повисоките цени, им отежнува на граѓаните да одлучат кога да одат во пензија. Секојдневните трошоци сè уште се главната пречка за штедењето во пензија. Некои постари граѓани велат тие не очекуваат да се пензионираат“, вели Индира Венкатесварен, портпаролка на ААРП.
Постојано се зголемува процентот на граѓани над 50 години кои веруваат дека нема да одат во пензија. Во јануари 2022 година изнесуваше 23 отсто, а во јули истата година 24 отсто, се вели во студијата која се спроведува двапати годишно.
„Видовме дека постарите работници продолжуваат да бидат во работната сила“, рече Дејвид Џон, висок советник за политика во Институтот за јавна политика на Американското здружение на пензионери.
Тој оцени дека делумна причина за тоа е тоа што немаат доволно пари за пензија.
„Тоа е проблем и веројатно ќе продолжи како што одминува времето“, смета Џон.
На конгресните избори во 2022 година, граѓаните на возраст над 65 години сочинуваа 30,4% од вкупниот број гласачи, додека генерацијата Z и милениумците сочинуваа 11,7%.
Бајден се обиде да им се допадне на постара група гласачи со често промовирање на ограничување од 35 долари на трошоците за инсулин за оние кои користат федерален Медикер. Тој зборуваше и за можноста Медикер директно да преговара со производителите за цените на лековите на рецепт.
Од друга страна, Трамп во неодамнешно интервју рече дека ќе биде подготвен да зборува за намалување на трошоците за социјално осигурување и Медикер.
Каролин Левит, портпаролката на неговата кампања, рече дека Трамп, како што рече, ќе продолжи силно да ги штити социјалното осигурување и Медикер во неговиот втор мандат.
Исто така, едно од прашањата што ќе влијае на способноста на американските граѓани да се пензионираат е финансиската солвентност на системот за здравствено осигурување и Медикер.
Во последниот годишен извештај на поверениците на тие програми се наведува дека можеби нема доволно пари за да се платат целосните бенефиции на милиони постари граѓани.
Медикер, здравственото осигурување финансирано од американската влада кое покрива 65 милиони постари лица и лица со попреченост – нема да може да плаќа целосни бенефиции за болничко лекување и престој во старечки дом до 2031 година, се вели во извештајот.
Беше посочено и дека две години потоа социјалното осигурување нема да има доволно средства да ги исплати целосните износи на своите корисници.
Наодите од анкетата на AP-NORC од 2023 година покажаа дека повеќето возрасни лица во Соединетите држави се противат на намалувањата на Medicare или социјалното осигурување. Исто така, повеќето поддржуваат оданочување на најбогатите – за да може Medicare да продолжи да функционира како што функционира.
Подготвено од А.Ѓ.
About Author
