15.03.2024 Скопје
Опцијата за испраќање војници на НАТО во Украина би била потенцијална закана од избувнувањето на Третата светска војна, изјави денеска италијанскиот министер за надворешни работи Антонио Тајани.
„Не верувам дека НАТО ќе влезе во Украина. Се надевам дека тоа нема да се случи“, рече Тајани на прашањето да ги коментира зборовите на францускиот претседател Емануел Макрон, кој не ја исклучи ниту таа опција.
Тајани додаде дека влегувањето во војна со Русија значи ризик од трета светска војна, отфрлајќи ја можноста италијанската армија да оди во Украина да се бори против рускиот напад.
„Ние сме за одбрана на меѓународното право и украинските слободи, но не сме за војна со Русија. На Киев му даваме воена, економска и техничка помош од различен вид, меѓутоа, влегувањето во војна ми се чини грешка, а сите Италијанци, како и сите разумни луѓе, не го сакаат ова“, истакна Тајани.
Тој изјави дека италијанските војници прават добра работа во Црвеното Море за да ги заштитат трговските бродови од нападите на Хутите.
„Италијанските војници прават добра работа во Либан, Африка и Ирак, тие се носители на мирот и слободата, а Италија не е во војна со Русија“, рече Тајани.
Подготвено од А.Ѓ.
About Author
